Ինչո՞ւ է կորոնավիրուսն ազդում լսողության եւ տեսողության վրա
ՀԱՍԱՐԱԿՈՒԹՅՈՒՆ
SARS-CoV-2 կորոնավիրուսն ախտահարում է ամենախոցելի օրգանները, այդ թվում՝ ուղեղը: Այս պատճառով հիվանդությունը հաղթահարելուց հետո բարդությունները կարող են անդրադառնալ պացիենտի լսողության եւ տեսողության վրա: Այսպիսի կարծիք է հայտնել իմունաբան Վլադիսլավ Ժեմչուգովը (Ռուսաստան), փոխանցում է ՏԱՍՍ-ը:
«Կորոնավիրուսը շատ բազմապլան է վնասում օրգանիզմը՝ սկսած արյամբ թթվածնի փոխադրումից, վերջացրած փաստացի բոլոր օրգաններում անոթներով եւ նյարդերով: Վիրուսը օրգանիզմում որտեղ թույլ տեղ է գտնում, այնտեղ էլ հարվածում է»,- ասել է մասնագետը:
Նրա խոսքով՝ այս դեպքում բարդությունների ծանրությունը կախված կլինի կոնկրետ պացիենտի օրգանիզմից: Արդեն դեպքեր են նկարագրվել, երբ հաղթահարած կորոնավիրուսային ինֆեկցիայից հետո լսողությունը ոչ միայն վատանում է, այլեւ հայտնվում են կեղծ ձայներ:
Դրանից բացի, COVID-19-ից հետո կարող է խանգարվել հյուսվածքների զգայունությունը, ինչը կարող է դրսեւորվել այրոցի, ծակծկոցի եւ «մրջյունների սողալու» ձեւով: Ժեմչուգովը չի բացառում նաեւ աչքերում բարդությունները՝ ընդհուպ մինչեւ կուրություն: Նրա խոսքով՝ այս դեպքում անհրաժեշտ է հաշվի առնել պացիենտի նախկին վնասվածքներն ու հիվանդությունները:
