«Արմենիա» ավիաընկերությունը ավիատոմսերի անվճար փոփոխություն կկատարի միայն այսօր

 Այսօր լարված իրավիճակ էր «Զվարթնոց» օդանավակայանում, քանի որ բազմաթիվ քաղաքացիներ չէին կարողանում մեկնել ՌԴ. խնդիրներ էին առաջացել կորոնավիրուսի թեստի պատասխանի կոդի հետ կապված։ Տեղի ունեցածը սաստիկ զայրացրել էր մարդկանց։

Նրանց մոտեցավ «Արմենիա» ավիաընկերության փոխտնօրեն Գևորգ խաչատրյանը և հայտարարեց, որ նրանք կարող են մոտենալ «Արմենիա» ավիաընկերության գլխամասային գրասենյակ, և անվճար փոփոխություն կկատարվի:

Նրա խոսքով՝ այն լաբորատորիան, որտեղ քաղաքացիները թեստավորվել են, պիտի զգուշացներ, որ ճանապարհորդելու համար իր թեստը համապատասխան ծրագրում չկա:

«Դուք գնացել եք, թեստը հանձնել եք, որը ծրագիրը չի ընդունում: Մեր ավիաընկերությունը պարտավոր չէ ձեր տոմսն անվճար փոխել, բայց քանի որ շատ եք ու խնդիր կա, ավիաընկերությունն այդ խնդրի պատասխանատվությունը կվերցնի իր վրա միայն առաջին չվերթի համար, որպեսզի դուք որևէ ֆինանսական կորուստ չունենաք»,- ասաց Խաչատրյանը:

Նրա խոսքով՝ այսօր ՌԴ մեկնող 260 ուղևորների միայն 7-8 տոկոսն է իրազեկված եղել, ուստի նրանց թեստերը համապատասխանել են չափանիշներին ու նրանք մեկնել են, իսկ 93 տոկոսը իրազեկված չեն եղել ու չեն մեկնել:

Խաչատրյանը Sputnik Արմենիայի հետ զրույցում հայտնեց` մյուս ուղևորներին զգուշացնում է, որ սա նախադեպ է, և միայն այս չվերթի համար անվճար կփոխեն տոմսերը։

«Խնդրում եմ սովորություն չսարքել և չփորձել պահանջել ավիաընկերությունից անվճար տոմսի փոփոխություն և հետո զայրանալ, թե ինչի չկարողացան մեկնել»,- ասաց Խաչատրյանը:

Անդրադառնալով տոմսերի գներին և այն շահարումներին, որ դրանք թանկացել են, փոխտնօրենը շեշտեց, որ չեն թանկացել, պարզապես պահանջարկը մեծ է, իսկ ավելի էժան տոմսերը վաղուց սպառվել են:

Հիշեցնենք, որ ՀՀ քաղաքացիների մուտքը դեպի ՌԴ բացվել է փետրվարի 1-ից՝ մեկ ամսով։

Փետրվարի 1-ին Հայաստանից դեպի Մոսկվա 4 չվերթ կիրականացվի: «Զվարթնոց» օդանավակայանի պաշտոնական կայքից տեղեկանում ենք, որ փետրվարի 1-ին դեպի Մոսկվա չվերթեր են իրականացնելու «Armenia», «Aeroflot» և «Red Wings» ավիաընկերությունները: