Ո՞ր վիտամինի պակասն է բարդություններ առաջացնում COVID-19-ի դեպքում

Վիտամին K-ի անբավարարությունը COVID-19-ի դեպքում առաջացնում է անոթների առաձգականության նվազման հետ կապված բարդություններ: Համատեղ հետազոտության արդյունքում նման եզրակացության են հանգել Նիդեռլանդների և Բելգիայի գիտնականները:

Այդ նյութի պակասը կարող է հանգեցնել COVID-19-ի ծանր ձևի զարգացման կամ նույնիսկ հանկարծամահության:

Վիտամին K-ն պատասխանատու է MGP սպիտակուցի գործունեության համար, որն իր հերթին ապահովում է առաձգական մանրաթելերի պաշտպանությունը քայքայումից: Սա վերաբերում է նաև թոքերին, որոնք շատ են տուժում կորոնավիրուսի պատճառով։ Գիտնականները կարծում են, որ վիտամին K-ի պակասի պատճառով աճում է անոթների վնասման վտանգը։

Սա իր հերթին թրոմբոզի սպառնալիք է, իսկ պոկված խոշոր թրոմբը կարող է փակել անոթը և նույնիսկ հանգեցնել հանկարծակի մահվան։

Հետազոտողները զգուշացրել են` տարիքի հետ վիտամին K-ի յուրացման ունակությունը նվազում է: Դրա վրա ազդում են նաև լյարդի և աղիքների հիվանդությունները, ինչպես նաև հակաբիոտիկները։

Գիտնականները խորհուրդ են տալիս սննդակարգում ներառել ավելի շատ կանաչ բանջարեղեն, յուղոտ պանիրներ, կաթ և կարագ։

Մեր օրգանիզմում աղիքների միկրոֆլորան է վիտամին K արտադրում։ Այս վիտամինի հիմնական գործառույթը արյան մակարդելիության գործոնների ձևավորումն է: Եթե աղիքների միկրոֆլորան առողջ է, ապա բավականաչափ վիտամին է արտադրվում։ Ամենաշատը վիտամին K են պարունակում չորացրած ռեհանը, սպանախը, շագանակը, վարունգը, կանաչ սոխը, ձիթապտղի յուղը, սալորաչիրը, եղինջը, բրոկկոլին, կաղամբը։