Մեզ պետք է նոր սահմանադրության ընդունում
ՀԱՍԱՐԱԿՈՒԹՅՈՒՆ
Հայաստանում ներկայիս իշխանությունները Բարձրագույն դատական խորհրդում փոփոխություններ են իրականացնում, ինչպես նաև փորձում են կոռուպցիոն գործերի քննության համար մասնագիտացված դատարաններ ձևավորել: Այս թեմայով 1or.am կայքը զրուցել է իրավապաշտպան Արթուր Սաքունցի հետ՝ պարզելու համար, թե որևէ արդյունք արդյոք պետք է ակնկալել այս իրավիճակում։
—Պարոն Սաքունց, Ռոբերտ Քոչարյանը իր վերջին հարցազրույցում հայտարարեց, որ կմասնակցի արտահերթ ընտրություններին և հույս հայտնեց, որ կհաղթի։ Չնայած նրա նկատմամբ հարուցված քրեական գործին՝ նա խոսում է ակտիվ քաղաքականություն վերադառնալու մասին, ինչի՞ հետևանք է սա և ինչ եք կարծում արդյո՞ք հասարակությունը կընդունի՞ նրան։
— Ես կարող եմ ասել իմ կարծիքը։ Ռոբերտ Քոչարյանը երբեք էլ քաղաքականությամբ չի զբաղվել ու չգիտեմ էլ թե արդյոք նա կարողանում է զբաղվել կամ որն է նրա քաղաքական հենարանը։ Ժամանակին, երբ որ ընտրվում էր, ասում էր, որ իր կուսակցությունը ժողովուրդն է։ Դա Հայաստանի Հանրապետությունում ամենաառաջին պոպուլիստական մոտեցումն էր։ Որովհետև այդպիսի քաղաքական մոտեցում Հայաստանում չի կարող լինել և բացի դրանից նաև այդ մոտեցումը իր բովանդակությամբ ավտորիտար մոտեցում է։ Հիմա չգիտեմ թե, որ քաղաքական կուսակցության հենքով է ինքը պատրաստվում։ Բայց այն իրավիճակը, որը հիմա գոյություն ունի Հայաստանում և որը հետևանք է իշխանությունների կողմից արմատական փոփոխություններ չկատարելու, Քոչարյանի նման մարդիկ կարող են իրենց իրավունք վերապահել հայտ ներկայացնելու և որպես քաղաքական գործիչ հանդես գալու։ Եվ դա ավելի շատ պատասխան է Նիկոլ Փաշինյանին և նրա իշխանությանը կամ հանրությանը, որովհետև հանրությունը իր դիրքորոշումը վաղուց ունի։ Ռոբերտ Քոչարյանը երբեք չի ընտրվել ու չի էլ ընտրվելու Հայաստանի Հանրապետությունում։ Դա միանշանակ է և եթե որևէ քաղաքական ուժ էլ փորձի հենարան կանգնի նրան, ապա այդ քաղաքական ուժը դատապարտված է ձախողման և պարտության։ Նորից եմ կրկնում, դա ավելի շատ պատասխան է այս իշխանության փնթի և անգրագետ կառավարմանը, որ նման մարդիկ հայտ են ներկայացնում փոխանակ մտածեն իրենց փրկության մասին։ Ես դա համարում եմ նաև քրեական պատասխանատվությունից խուսափելու հնարքներից մեկը և դա ուղղակի քրեական ու քաղաքական գործոնները միախառնելու հերթական փորձն է, որից այդպես էլ չկարողացանք ձեռբազատվել այս տարիների ընթացքում։
—Հիմա Բարձրագույն դատական խորհրդում են փոփոխություններ իրականացնում, փորձում են կոռուպցիոն գործերի քննության համար մասնագիտացված դատարաններ ձևավորել, արդյոք պե՞տք է արդյունք սպասել այս գործընթացից։
— Դրանք տարբեր գործընթացներ են։ Մեկը Բարձրագույն դատական խորհուրդի մասին է խոսքը, որ մենք գտնում ենք, որ մինչև ամբողջ դատական համակարգում արմատական փոփոխություն չլինի, ԲԴԽ-ի բովանդակությունը չի փոխվելու։ Առանձին անձանց փոփոխություններով, մանավանդ, որ դա հատային ինչ-որ քայլեր են և դրա համար մեզ պետք է լուրջ սահմանադրական փոփոխություն, նոր սահմանադրության ընդունում, դատական վեթինգի իրականացում, որովհետև ի վերջո որոշ անդամներ ընտրվում են հենց դատավորների ժողովի կողմից, այնպես որ դա որևիցե բովանդակային փոփոխության չի հանգեցնի։ Կոռուպցիոն դատարանի հետ կապված կարող եմ ասել, որ կրկին նույն դատական փոփոխությունների բացակայության պարագայում հատվածային մոտեցում է և չի կարող երաշխավորել հնարավոր արդյունավետությունը։ Չնայած մասնագիտական դատարաններ պետք են և մասնագիտական դատարանների ձևավորման պրակտիկայում արդարադատության իրականացումը նաև երաշխավորում է։ Տեսեք, մենք ունենք վարչական, քրեական, քաղաքացիական դատարաններ և մեզ պետք է նաև կոռուպցիոն դատարան։ Հատկապես կոռուպցիայի խորը լինելու հանգամանքում մեզ պետք է կոռուպցիան հաղթահարելու, կոռուպցիոն հանցագործությունները բացահայտելու ուղղությամբ աշխատանքներ։ Բայց այդ դատավորները գալու են, ներգրավվելու են դատական համակարգի ներսում։ Նրանք մեկուսի չեն մնալու և մթնոլորտ չեն փոխելու այդ 20-30 հոգին։
Սոնա Գիշյան
