«2020-ին սպասելիքներս մեծ էին ու դրական, բայց ի՞նչ ստացանք...». Անուշկա Մարգարյանը` Ամանորը չնշելու, ներքին ու արտաքին փոփոխությունների մասին
ՖՈՏՈ
Դերասանուհի Անուշկա Մարգարյանը, որն այս շրջանում նկարահանվում է «Սարի աղջիկը» հեռուստասերիալում, ասում է` թվերի նշանակությանը հավատում է, թեեւ 2021-ի հետ աշխատում է սպասելիներ չկապել.
«Սպասելիքներ առանձնապես չունեմ: 2020-ին սպասելիքներս մեծ էին ու դրական, բայց ի՞նչ ստացանք... Ավելի շատ փորձում եմ դասեր քաղել, ոչինչ հենց այնպես չի լինում: Այս ամենը պատասխան է մեզ, հուսով եմ` բոլորս դասեր կքաղենք ու կփոխենք ինքներս մեզ` դառնալով ավելի լավը»,-NEWS.am STYLE-ի հետ զրույցում անկեղծացավ դերասանուհին:
«Գուցե տարօրինակ հնչի, բայց վերջին մի քանի տարին զգացել եմ, որ ինչ-որ ահավոր բան է լինելու: Մարդիկ սարսափելի չարացել են, ու դա զգում եմ ամեն պահի... Սկսել են գնահատել միայն նյութականը, ոչ մի հոգեւոր արժեք չի մնացել, ատում են իրար` սիրելու փոխարեն: Սա տիեզերքի պատասխանն է մեզ: Հավատքն իսպառ վերացել է, պետք է ուշքի գալ, արթնանալ...»,-համոզված է դերասանուհՎերջին շրջանում Անուշկան դիմել է արտաքին փոփոխության` վերածվելով կարմրահերի, սակայն նշում է` տվյալ ոճափոփոխությունն իր դեպքում կապ չունի ներքինը փոխելու հետ: Ասում է` եթե չաշխատի ներաշխարհի վրա, ոչ մի կերպարանափոխություն չի ազդի տրամադրության վրա:
«Ոճային փոփոխությունը «Սարի աղջիկը» սերիալի կերպարիս համար էր: Երկար տարիներ ցանկացել եմ մազերս այդ երանգի ներկել, բայց վախեցել եմ: Նոր կերպարը ստիմուլ էր, բացի այդ` կերպարանափոխվելու կարիք կար: Իսկ կյանքում գույներ ավելացնելու համար արտաքին փոփոխություններն ինձ չեն օգնի, եթե ներսումս ոչինչ չփոխեմ...»:
Անուշկան, ինչպես շատերը, անհամբերությամբ է սպասում 2020-ին հրաժեշտ տալուն, բայց Ամանորն այս տարի հատուկ ձեւով չի դիմավորելու.
«Տոնածառ չենք դրել ու չենք դնելու, չնայած խոստովանեմ` եթե տանը բալիկներ լինեին, միանշանակ կդնեի: Երեխաներին պետք է զերծ պահել նեգատիվից»,-ասում է նա ու հավելում,-«Ոչինչ չենք պատրաստել, նշելու տրամադրություն, առհասարակ, կարծում եմ` ոչ ոք չունի: Կեսգիշերին ընտանիքիս հետ, ուղղակի, կճանապարհենք այս տարին ու կդիմավորենք նորը: Իսկ միակ երազանքս այս տարի խաղաղությունն է»:
Սյունե Առաքելյան
