Ինչպե՞ս ճիշտ բաշխել զոհված զինվորների ընտանիքներին փոխանցվող դրամական կամ այլ միջոցները

Վերջին օրերին հաճախ է քննարկվում զոհված զինծառայողների ընտանիքների սոցիալական վիճակը: Ու թեեւ ժամանակ առ ժամանակ լսում ենք, որ որեւէ ընտանիքի որեւէ մեկը օգնություն է ցուցաբերել, բայց ստացվում է այնպես, որ նրանց մի մասը անտեսված են մնում միայն այն պատճառով, որ գուցեեւ սգավորի «կարգավիճակից» դրդված չեն բարձրաձայնում իրենց խնդիրների մասին:

Առաջիկայում ՀՀ կառավարության որոշմամբ ստեղծվելու է հանձնաժողով, որը զբաղվելու է զոհված զինծառայողների ընտանիքների կարիքների գնահատմամբ եւ դրամական աջակցության բաշխմամբ: Արձանագրելով, որ այս նախագիծը եւս հասարակության կողմից միանշանակ չի ընդունվել՝ տեղեկացնենք, որ համապատասխան նախագիծը դեռ նախորդ շաբաթվանից շրջանառության մեջ է, իսկ այսօր մեզ Աշխատանքի եւ սոցիալական հարցերի նախարարությունից այս կապակցությամբ հայտնեցին, որ հանձնաժողովը ձեւավորման փուլում է:

Իսկ մինչ այդ, ինչպես տեղեկացրել ենք, ՀՀ աշխատանքի եւ սոցիալական հարցերի, ՀՀ պաշտպանության եւ ՀՀ տարածքային կառավարման և զարգացման նախարարությունների ներկայացուցիչներից կազմաված աշխատանքային խումբը մշակել և հաստատել է զոհված զինծառայողների ընտանիքների կարիքների գնահատման մեթոդաբանությունը:

Ուսումնասիրվել են Լեռնային Ղարաբաղի Հանրապետության եւ ադրբեջանական զորքերի շփման գծում 2016 թվականի ապրիլի սկզբներին տեղի ունեցած ռազմական բախումների հետևանքով զոհված 64 զինծառայողների ընտանիքներ:

Պարզվել է, որ նշված 64 զինծառայողներից 10-ի ընտանիքներում կան 17 անչափահաս երեխաներ: Զոհված 15 զինծառայողների ընտանիքներում կան ուսանողներ: Ուսումնասիրությունների ընթացքում պարզվել է, որ գյուղատնտեսությամբ զբաղվելու համար աջակցության տրամադրման դեպքում զոհվածի ընտանիքը կզբաղվի գյուղատնտեսական գործունեությամբ:

Պարզվել է նաեւ, որ զոհված զինծառայողների ընտանիքների որոշ անդամներ ունեն առողջական խնդիրներ, բժշկական հետազոտության կարիք, որոշները` վիրահատության կարիք, ինչպես նաև` հոգեբանական ծառայության:

Կան նաեւ ընտանիքներ, որոնք ունեն վարկային պարտավորություններ, իսկ որոշ ընտանիքներ` նաև կոմունալ վճարումների դիմաց:

Զոհված 3 զինծառայողների եղբայրները զինծառության մեջ են գտնվում: Ու թեեւ նախարարությունից տեղեկացնում են, որ ՀՀ պաշտպանության նախարարության և պաշտպանության բանակի կողմից, ինչպես նաև մեր բազմաթիվ հայրենակիցների եւ կազմակերպությունների կողմից նշված ընտանիքներին տրամադրվել են և շարունակում են տրամադրվել դրամական օժանդակություններ, սակայն այս պահին նախարարությունում որեւէ տվյալ չկա, թե ընդհանուր առմամբ որքան գումար է հանգանակվել այդ ընտանիքներին տրամադրելու համար, քանի ընտանիքի է տրամադրվել եւ հատկապես ում:

Նախարարությունից այս կապակցությամբ հայտնում են, որ այդ աշխատանքները իրականացվելու են ստեղծվելիք հանձնաժողովի կողմից:

Ընդգծենք, որ բացի մասնավոր օգնությունները՝ զինծառայողի զոհվելու դեպքում Պաշտպանության նախարարությունը նրա ընտանիքին տրամադրվում է 2 մլն դրամ ապահովագրական վճար, ինչպես նաև 1.4 մլն դրամ հուղարկավորության կազմակերպման եւ 700.000 դրամ գերեզմանների բարեկարգման համար, որոնք վճարվում են ՀՀ պաշտպանության նախարարության կողմից, իսկ ընտանիքների անաշխատունակ անդամներին նշանակվում են ամսական վճարվող կենսաթոշակներ և պարգեւավճարներ: