Լարված իրավիճակ ՊՆ–ի մոտ. ոստիկանության մեծ ուժեր են կուտակվումԼարված իրավիճակ ՊՆ–ի մոտ. ոստիկանության մեծ ուժեր են կուտակվում

Այս պահին ոստիկանության մեծ ուժեր են կուտակվում ՀՀ պաշտպանության նախարարության դարպասների մոտ, քանի որ անհետ կորած զինծառայողների վրդովված հարազատները, որոնք հավաքվել են անցակետի մոտ, խոստացել են ամեն գնով ներս մտնել։

Ոստիկանների գալը զինծառայողների հարազատներին ավելի զայրացրեց։

«Ոստիկաններ, ի՞նչ եք ուզում, իմ որդին 40 օր է` անհետ կորած է, երկու ամսվա ծառայողին կռվի դաշտ են տարել, չե՞ք հասկանում, որ էս իրավիճակում դուք էլ պիտի պայքարեք»,-ոստիկաններին դիմեց նրանցից մեկը։

Մի տղամարդ էլ սկսեց ոտքով հարվածել ճաղավանդակներին, իսկ հավաքված կանայք ոստիկաններին թույլ չտվեցին միջամտել։

«Չհամարձակվեք խանգարել»,-ասացին նրանք։

Տղամարդուն հաջողվեց կոտրել ճաղավանդակը։ Ոստիկանները փորձում են ծնողներին խանգարել ներս մտնել։ Ծնողները պատրաստ են ճաղավանդակից այն կողմ գտնվող ապակյա դուռը ևս կոտրել։

«Բացեք դուռը, մարդավարի խոսենք»,-բորբոքված նշեց ծնողներից մեկը։

Ոստիկանները փորձում են հանգստացնել ծնողներին, սակայն չի ստացվում։ Ճաղավանդակներին մոտեցավ անհետ կորած զինծառայողներից մեկի կինը, որին հաջողվել էր ծնողների առաջին խմբի հետ ներս մտնել։ Նա հայտնեց, որ իրենցից մի քանի հոգու ներս են թողել, որպեսզի զրուցեն ՊՆ ղեկավարության հետ։

«Մեզ էլ ներս չթողեցին, մենք էլ ենք հիմա միանալու ձեզ, միասին սպասենք, բոլորիս նույն բանն են ասելու»,-ասաց կինը։

Նրա խոսքերը մի փոքր հանգստացրին բորբոքված ծնողներին։

Հիշեցնենք`անհետ կորած զինծառայողների ծնողներն ու հարազատները մոտ մեկ ամիս է` ակցիաներ են անում ՊՆ–ի ու կառավարության շենքերի մոտ և գործուն քայլեր պահանջում իշխանությունից։ 

Նրանք այսօր կրկին հավաքվել են ՀՀ պաշտպանության շենքի դիմաց և ցանկանում են հանդիպել պաշտպանության նախարար Վաղարշակ Հարությունյանի հետ։

Read more: https://armeniasputnik.am/armenia/20201216/25771190/larvats-iravijak-pn-i-mot.html