Մեզ այդպես էլ չի հաջողվում հասկանալ, թե ով ենք մենք և ինչ երկիր ենք ուզում ունենալ
ՔԱՂԱՔԱԿԱՆՈՒԹՅՈՒՆ
Քաղաքագետ Սուրեն Պետրոսյանը խոսելով ընդդիմության կողմից ՀՀ վարչապետին տված վերջնաժամկետի մասին` նշեց, որ իր կարծիքով Փաշինյանը չի բավարարի պահանջը, քանի որ այս պահին բավականին ամուր է կառչած իր աթոռին: Բացի այդ, իշխող վերնախավն այս պահին տեսնում է անձնական անվտանգության խնդիր:
Միևնույն ժամանակ օրվա իշխանությունը բավական մեծ նվեր է արտաքին ուժերի համար:
«Այն իշխանությունը, որը կանգնած է տապալված պետության գլխին, լինելով տապալման հեղինակը, շատ ավելի հեշտ մանիպուլյացվող է և շատ ավելի հեշտ է գնում սակարկությունների: Ուստի, այն իշխանությունը երկար մնալու դեպքում մենք ավելի անհամաչափ զիջումների ենք գնալու բոլոր մակարդակներում, քան պետք էր: Մյուս կողմից հարթակում և այլ ձևաչափերով հնչող ելույթները տանում են իրավիճակը սրելու ուղղությամբ, որը բավականին սուր կերպով կախված է մեր գլխին: Սա լրջագույն քաղաքական խնդիր է, որը կարող է սպառնալ ինչպես մեր պետության անվտանգությանը, այնպես էլ հայկականության անվտանգությանը»,- 1or.am-ի հետ զրույցում ասաց քաղաքագետը:
Սուրեն Պետրոսյանի դիտարկմամբ երկրում ստեղծված սոցիալ-տնտեսական, քաղաքական ճգնաժամը մեղմելու փոխարեն, իրավիճակը սրելու ճանապարհով գնալը իրատեսական չէ: Հարկավոր է ամեն ինչ անել, լարվածությունը թուլացնելու համար:
«Մենք ունենք բազմաթիվ մտածող մարդիկ, բայց մեր երկրում տեղի ունեցող իրադարձությունները անվերջ պտտվում են նույն անձերի շուրջ: Նույն անցյալն անվերջ վերհանում ենք ու պտտվում ենք դրա շուրջ: Մինչդեռ մեզ պետք է առաջ շարժվել: Մեզ պետք է ընդդեմի փոխարեն գործել հանունի: Նույնն է եղել Երկրորդ և Առաջին Հանրապետությունների ժամանակ: Եվ երբեք չենք կարողացել վեր կանգնել անձնական հարաբերությունները քաղաքական դաշտ բերելու արատավոր սովորույթից: Մեզ այդպես էլ չի հաջողվում հասկանալ, թե ով ենք մենք և ինչ երկիր ենք ուզում ունենալ: Սա է խնդիրը, որը թույլ չի տալիս մեզ առաջ շարժվել»,- ասաց Ս. Պետրոսյանը:
Աննա Կարապետյան
