Ստեփանակերտում ցանկանում են վերականգնել ղարաբաղյան առաջին պատերազմի ժամանակ քանդված կայարանը
ՀԱՍԱՐԱԿՈՒԹՅՈՒՆ
ren.tv-ն գրում է, որ ոուս զինվորականները Լեռնային Ղարաբաղում սկսել են գործողությունների ամենավտանգավոր փուլերից մեկը: Սակրավորների ջոկատները, որոնելով պայթուցիկ նյութեր և ականներ, սանրում են տարածքը: Շատ տարածքներ բառացիորեն ցանված են ականադաշտերով, և նույնիսկ տեղացիները երկար տարիներ չեն եղել այդ տարածքներում:
Այդ վայրերից մեկն էլ Ստեփանակերտի երկաթուղային կայարանն է, որտեղ 30 տարի, նույնիսկ ղարաբաղյան առաջին պատերազմից հետո, ոչ մեկը ոտք չի դրել: Բայց թերթի թղթակից Դենիս Կուլագային հաջողվել է մտնել այդ արգելված տարածք և եզակի կադրեր նկարահանել: Ժանգոտ ռազմական տեխնիկա ղարաբաղյան առաջին պատերազմից, հին գնացքներ և շրջված վագոններ:
Նախկինում այդ կայանը կապում էր Լեռնային Ղարաբաղի մայրաքաղաքը այնպիսի քաղաքների հետ, ինչպիսիք են Մոսկվան և Բաքուն: Բայց առաջին պատերազմից հետո, կայարանը ամբողջությամբ ավերվել է: Հիմա այնտեղ հատուկ հանձնաժողով է աշխատում պարզելու համար, թե ընդհանրապես հնարավո՞ր է վերականգնել այն և Ստեփանակերտը կապել երկաթուղով:
Ռելսերը կտրտված են, հարթակներից ոչ մի հետք չկա: Միայն խոշոր տառեր են գետնին ընկած՝ Ստեփանակերտ: Անգամ տեղի բնակիչներն են առաջին անգամ տեսնում այդ կադրերը: Այդտեղ մուտքը խստիվ արգելված է եղել:
Եռակողմ համաձայնագրի ստորագրումից անմիջապես հետո սկսել են խոսել Հայաստանը, Նախիջևանը, Ղարաբաղը և Ադրբեջանը միացնող երկաթուղու մասին: Հայտարարության իններորդ պարբերությունում նշված է տարածաշրջանի բոլոր տնտեսական և տրանսպորտային կապերի ապաշրջափակման մասին: Այժմ մնում է պարզել, թե ինչպես սկսել այդ աշխատանքը: Տեղական իշխանությունները չեն թաքցնում, որ այդ հարցում ամբողջությամբ ապավինում են Ռուսաստանի արտակարգ իրավիճակների նախարարության մասնագետներին:
Այժմ տարածաշրջանում Արտակարգ իրավիճակների նախարարության ռուս մասնագետների համար թեժ ժամանակ է: Վերջերս ստեղծվել է մարդասիրական արձագանքման կենտրոն: Քանդված շինությունների ուսումնասիրության համար անընդհատ դիտարկումներ են իրականացվում և հայտեր ուղարկվում մարդասիրական օգնության համար` հիմնականում շինանյութերի համար:
Հնարավո՞ր է արդյոք, որ տեսանելի ապագայում այդ լեռների լանջերին կրկին լսվի մարդատար և բեռնատար գնացքների անիվների ձայնը: Առայժմ ոչ ոք չի համարձակվում կանխատեսել դա: Ներկայումս բոլոր ջանքերը գործադրվում են ապահովելու համար այն, որ տներում, որտեղ փախստականներն են վերադառնում, ջերմություն ապահովվի և սոցիալական կարևոր օբյեկտները ամբողջ հզորությամբ աշխատեն:
Նյութը հրապարակման պատրաստեց Կամո Խաչիկյանը
