Իշխանության տարբեր օղակներ սկսել են իրար հակասել

Պետական բարձրաստիճան պաշտոնյաները սկսել են առանց երկար մտածելու հակասական հայտարարություններ անել՝ հակասելով անգամ իրենք իրենց և այս պահին իրականացվող քաղաքականությանը: Եվ տպավորությունն այնպիսին է, որ նրանք կա՛մ դադարել են տիրապետել իրավիճակին, կա՛մ հեռու են իրականությունը ռեալ գնահատելուց: Օրերս Էկոնոմիկայի նորանշանակ նախարար Վահան Քերոբյանը հայտարարել էր, որ եթե Թուրքիայի և Ադրբեջանի սահմանները բացվեն, Հայաստանի տնտեսությունը կշահի դրանից: Նույն միտքը կիսել էր նաև ԱԺ «Իմ քայլ»-ական պատգամավոր Հայկ Գևորգյանը, որը ընդամենը մի քանի օր առաջ էր «կողմ» քվեարկել՝ հունվարի 1-ից թուրքական ապրանք Հայաստան ներմուծելու արգելք սահմանող օրինագծին:

 

ԱԺ տնտեսական հարցերի մշտական հանձնաժողովի նախագահ Բաբկեն Թունյանն, այսօր անդրադառնալով այս հարցերին, նշեց, որ էմբարգոյի մասին ընդունված օրենքը կգործի հունվարի 1-ից՝ վեց ամիս ժամկետով: 1or.am-ի հարցին, թե՝ արդյոք վեց ամիս հետո այն կդադարի գործել, Բ. Թունյանն ասաց, որ դեռ պետք է հայկական արտադրությունը զարգացնելու մասին մտածել, նոր միայն այլ երկրներից ներմուծելու մասին խոսել:

 

Ստացվում է՝ իշխանական վերնախավի անդամների՝ հայկական արտադրությունը զագացնելու մասին կարծիքները բավականին տարբերվում են իրարից: Մեկը շարունակում է Հայաստանը տեսնել՝ որպես ներմուծող ու սպասարկող երկիր, մյուսը՝ կողմ է հայրենական արտադրության զարգացմանը: Ամեն դեպքում մեկ բան ակնհայտ է, որ անկախությունից հետո Հայաստանի տնտեսությունը այնպես է հողին հավասարեցվել, որ դեռ երկար ժամանակ է պետք ոտքի կանգնելու համար: Իսկ եթե նման հակասական վերաբերմունք լինի, դժվար էլ կարողանանք առաջիկայում տնտեսություն զարգացնել: