Ինչու է վիրավոր զինծառայողի Հնդկաստան տեղափոխման հարցը ձգձգվում. ՊՆ պարզաբանումը

Պաշտպանության նախարարության տեղեկատվության եւ հասարակայնության հետ կապերի վարչությունը պարզաբանում է ներկայացրել հոկտեմբերի 29-ին NEWS.am-ում հրապարակված «Բուժման գումարն էլ հիմնադրամն է տալիս, բայց ՊՆ-ն ինքնաթիռ «չի գտնում». վիրավորված Ավետիսը դեռ այստեղ է» հոդվածի վերաբերյալ:

Պարզաբանման մեջ մասնավորապես ասվում է. «ՊԲ N զորամասի նախկին պարտադիր ժամկետային զինծառայող շարքային Ավետիս Զարգարյանը (ծնված 1996թ) հակառակորդի կողմից ապրիլի 4-ին ստացել է համակցված ողնաշար-ողնուղեղային կույր հրազենային վիրավորում եւ հաջորդ օրն ուղղաթիռով տեղափոխվել ՀՀ ՊՆ ԿԿԶՀ վերակենդանացման բաժանմունք:

Վիրավորման հետեւանքով առաջացել է ողնուղեղի պարանոցային եւ կրծքային հատվածի ծանր աստիճանի սալջարդ-ջնջխում:

Օգոստոսի 19-ին Ավետիս Զարգարյանը տեղափոխվել է հիվանդասենյակ, վիճակը գնահատվում է միջին ծանրության: Բուժման եւ կինեզոթերապիայի ընթացքում Ա.Զարգարյանի մոտ գրանցվել է դրական առաջընթաց, մասնավորապես՝ ձեռքերում եւ ոտքերում շարժումները մասամբ վերականգնվել են: Ներկա պահին ակտիվ Ա.Զարգարյանը ինքնուրույն կարողանում է կանգնել:

Բուժմանը զուգընթաց միջոցներ են ձեռնարկվել նաեւ Ա. Զարգարյանի վերականգնողական բուժումն օտարերկրյա պետություններում կազմակերպելու համար:

Բժշկական փաստաթղթերը թարգմանվել են անգլերեն լեզվով եւ կատարվել է համապատասխան հարցումներ՝ վերականգնողական բուժման ձեւերի, ժամկետների եւ բուժման համար անհրաժեշտ ծախսերի վերաբերյալ:

Արդյունքում Հունաստանի «Էվեքսիա» վերականգնողական կլինիկայից ստացվել է Ա.Զարգարյանի վերականգնողական բուժման վերաբերյալ համապատասխան տեղեկատվություն, ըստ որի վերականգնողական բուժման ծախսերը մեկ ամսվա համար կազմում են 8.900 եվրո, առանց ճանապարհածախսի եւ ուղեկցողի:

Ստացված եզրակացությունը պահանջվող մյուս փաստաթղթերի փաթեթով ս.թ. օգոստոսի 23-ին ուղարկվել է ՀՀ առողջապահության նախարարություն՝ ՀՀ կառավարության 2016 թվականի ապրիլի 21-ի N 410-Ն որոշմամբ սահմանված կարգով եւ պայմաններով՝ օտարերկրյա պետությունում վերականգնողական բուժման հնարավորությունները քննարկելու համար: Հանձնաժողովը տվել է բացասական եզրակացություն, քանի որ Ա.Զարգարյանը Հայաստանի Հանրապետության վերականգնողական կենտրոններում դեռեւս ակտիվ վերականգնողական բուժօգնություն չի ստացել եւ դեռեւս կարիք կա վիրաբուժական միջամտությունների: Նշանակվել է նաեւ ՀՀ առողջապահության նախարարության առաջատար մասնագետների կոնսիլիում ՀՀ ՊՆ ԿԿԶՀ-ում, որին մասնակցել են նաեւ նյարդավիրաբույժներ բ.գ.դ. պրոֆեսոր Ռուբեն Վիկտորի Ֆանարջյանը եւ բ.գ.թ. Անդրանիկ Իշխանի Քալաջյանն ու այլ մասնագետներ, ովքեր շատ բարձր են գնահատել Ա.Զարգարյանին ցուցաբերած բուօգնության որակը եւ ծավալները, տվել են հստակ բժշկական ցուցումներ հետագա բուժական եւ վերականգնողական տակտիկայի վերաբերյալ:

ՀՀ ԶՈւ ռազմաբժշկական ծառայության միջնորդությամբ «Հայկական վիրավոր հերոսների հիմնադրամ»-ը նույնպես ակտիվ աշխատանքներ է տարել Ա.Զարգարյանի վերականգնողական բուժումն արտերկրում կազմակերպելու ուղղությամբ: Հիմնադրամի ներկայացուցիչներն օգոստոսի 30-ին հանդիպել են Ա.Զարգարյանին եւ նրա ծնողներին՝ նրանց առաջարկելով վերականգնողական բուժումը հիմնադրամի աջակցությամբ կազմակերպել Հնդկաստանի «Արտեմիս» հոսպիտալում:

Բարերար Հրանտ Թումասյանը Ավետիս Զարգարյանին նվիրաբերել է ժամանակակից էլելկտարական անվասայլակ: Հիմնադրամի ներկայացուցչի հետ ՀՀ ՊՆ ԿԿԶՀ-ում հանդիպման ժամանակ նա հայտնել է, որ հավաքված է բավարար քանակի գումար Ա.Զարգարյանի վերականգնողական բուժումը Հնդկաստանի «Արտեմիս» հոսպիտալում կազմակերպելու համար, սակայն խնդրահարույց է տեղափոխման հարցը, քանի որ մինչեւ Դելի ՀՀ-ից ուղիղ օդային հաղորդակցություն չկա, ավիափոխադրողները հանձն են առնում պառկած վիճակում վիրավորին տեղափոխել մինչեւ Մոսկվա: Նստած վիճակում Ա. Զարգարյանը չի կարող տեղափոխվել երկարատեւ, իսկ ընդհանուր թռիչքի տեւողությունը գերազանցում է 9 ժամը»,- ասվում է պարզաբանման մեջ:

Հիշեցնենք, որ Ավետիսը Ռուսաստանից էր եկել՝ ծառայության նպատակով, ընտանիքը Հայաստան է վերադարձել ապրիլին, Ավետիսի վիրավորվելու մասին իմանալուց հետո: Շուրջ 5 ամիս է՝ Ավետիսի ծնողներն ապրում էին բարեկամներից մեկի տանը, օրերս ստիպված բնակարան են վարձել եւ տեղափոխվել: Ինչպես են տան վարձը վճարելու, իրենք էլ չեն պատկերացնում. Ավետիսի մայրն ամբողջ օրը հիվանդանոցում է, որդուն է խնամում, իսկ հայրը դեռ աշխատանքի չի գտել: Հայաստան է վերադարձել նաեւ Ավետիսի եղբայրը, որը հաջորդ տարի պետք է ծառայության մեկնի: