Բաքուն միջազգային հետախուզում է հայտարարել այն մարդկանց նկատմամբ, որոնք ոսկի են արդյունահանել Ղարաբաղում
ՀԱՍԱՐԱԿՈՒԹՅՈՒՆ
news.ru-ն գրում է, որ Ադրբեջանը միջազգային հետախուզման մեջ է ներառել մի քանի ձեռնարկատերերի, որոնք մասնակցել են Լեռնային Ղարաբաղի Զանգելանի շրջանում ոսկու հանքավայրերի շահագործմանը:
Ադրբեջանի հարկերի նախարարությունը, հղում կատարելով Ադրբեջանի գլխավոր դատախազության հաղորդագրությանը հաստատել է, որ Vallex Group ընկերության մասնաճյուղը և Base Metals ՓԲԸ-ն, որը պաշտոնապես գրանցված է Շվեյցարիայում, 2009-2017 թվականներին ապօրինաբար 301.9 միլիոն մանաթ (177.5 միլիոն դոլար) եկամուտներ է ստացել Զանգելանի շրջանի Վեժնալի գյուղի թանկարժեք մետաղների հանքավայրի շահագործումից: Vallex Group-ի ֆինանսական ներդրող, Շվեյցարիայի քաղաքացի Վարդան Սիրմակեսը, ընկերության ղեկավար Վալերի Մեժլումյանը և Base Metals-ի գործադիր տնօրեն Արթուր Մկրտումյանը մեղադրվում են եկամուտների ապօրինի ստացման մեջ: Դրա առթիվ դատարանը որոշում է ընդունել խափանման միջոց ընտրել կալանքի տեսքով: Բացի այդ, երեքն էլ Ադրբեջանի քննչական մարմինների կողմից միջազգային հետախուզում են հայտարարվել:
Որպեսզի պարզվի Ադրբեջանին և երկրի քաղաքացիներին հասցված վնասի չափը, դատախազները քննչական զննման գործողություններ են իրականացնում Վեժնալի գյուղի տարածքում, որտեղ երկար տարիներ շահագործվել են ոսկու հանքավայրեր: Բացի այդ, Ադրբեջանի գլխավոր դատախազությունը միջազգային իրավաբանական օգնության խնդրանքով դիմել է Շվեյցարիայի իրավասու մարմիններին քրեական գործով անհրաժեշտ քննչական գործողություններ իրականացնելու համար:
Նյութը հրապարակման պատրաստեց Կամո Խաչիկյանը
