Այսօր ճակատագիրը մեր հասարակությանը, պետությանը, քաղաքացուն շատ թանկ դաս է տալիս

Արմեն Թավադյանն իր ֆեյսբուքյան էջում գրում է.

Այսօր ճակատագիրը մեր հասարակությանը, պետությանը, քաղաքացուն շատ թանկ դաս է տալիս: Վերլուծական կարողություններ ու քննադատական միտք ունեցողներն անում են հետևություններ, մնացածն էլ ոնց որ միշտ կոմֆորմիստական, եթե չասեմ գլուխը խորը ավազի մեջ խրած ջայլամի դերում են, թմբիրում:
Իսկ դասը կայանում է նրանում, թե ինչ է լինում երբ ընտրում ես ոչ թե խելքով, չափորոշիչներով ու անցած ճանապարհին նայելով այլ մանիպուլյացիաների ու գերակշռող նեգատիվ ֆոնով գեներացված էմոցիաների հիման վրա: Երբ չես գնում ընտրության և քո փոխարեն ընտրում են:
Իսկ լինում է այնպես, որ կորցնում ես հայրենիքի մի մասը, կորցնում ես հավատ, հույս, կոտրվում ես բոլոր առումներով, ազգը պառակտվում է, տիրում է տոտալ քաոս, պատասխանատվություն ստանձնածները թքած են ունենում իրենց մանդատ տվողների կարծիքի վրա: Վարչապետի աթոռը զբաղեցրած անձը թքած ունի իր իսկ քաղաքական թիմի վրա, իրենք թքած ունեն միմյանց կարծիքի վրա և այդպես շարունակ: Ազգային Ժողովի բարձր ամբիոնն այնքան է արժեզրկվել որ մարդիկ չեն էլ հետևում, քանի որ այնտեղ այսօրվա քաղաքական թիմը երկրի առջև ծառացած լրջագույն մարտահրավերների մասին խոսելու փոխարեն, քաղաքական դիսկուրսը իջեցրել են մի մակարդակի որտեղ պաշտպանության հանձնաժողովի նախագահն ու պաշտպանության նախարարը երրորդ օրն է ինչ որ անմակարդակ փոխհրաձգությունների մեջ են: Շատ գայթակղիչ է իհարկե ասել այն ինչ կասեր նույն քաղաքական թիմի անդամ մի դերասան «ձեններդ կտրեք երկուսդ էլ ճիշտ եք»: Բայց իրականում ցավում ես, քանի որ գիտես, որ հարյուրավոր անհայտ կորածների հարազատներ օրեր շարունակ դռնեդուռ են ընկել իրենց հարազատների մասին որևէ լուր իմանալու համար, զոհված հերոսների ծնողները իրենց զավակների դիակը չեն գտնում, որ գոնե պատվով հանձնեն հողին, որը պաշտպանելիս հերոսաբար զոհվել են, վիրավոր զինվորներն ունեն հսկայական աջակցության կարիք, կայարաններում հազարավոր մարդիկ մրսած, սոված սպասում են իրենց խոստացված տրանսպորտային միջոցին որ հասնեն Արցախ, տասնյակ հազարավոր մարդիկ գտնվում են ծայրահեղ ծանր սոցիալական վիճակում, Քարվաճառից մարդիկ չեն կարողանում տեղափոխել գոնե այն ինչ հնարավոր է, կովիդով 120.000 վարակված ունենք, ահռելի թվով օրեցօր աճող մահեր, ազգային արժույթ ունենք արագ տեմպերով արժեզրկվող և այլն և այլն:
Իսկ երկրի ղեկավարը լուրջ, ցինիկ դեմքով հարցազրույցներ է տալիս, նորանոր մեղավորներ նշանակում, ֆեյքերի զորքեր կառավարում վիրտուալ տիրույթում լայքեր հավաքելու և թվարկածս բոլոր խնդիրները բարձրացողներին անպատվելու և լռեցնելու համար:

Կարծում եք մենք արժանի ենք այսպիսի ղեկավարի?

Ես վստահ եմ, որ ոչ:
Ինձ հաճախ հարցնում եք իսկ ով է փոխարինելու? իմանանք, նոր սրա դեմ ցույցի գանք: Ես այդ պատասխանը չունեմ, բայց հենց այդ պատասխանը գտնելու համար եմ ուզում որ բոլորդ բարձրաձայնեք ձեր անհամաձայնությունը, խոսեք նրանց փոխարեն ովքեր այսօր սգի մեջ են, անճարության մեջ են, ովքեր պարզապես խոսել ի վիճակի չեն: Ի սեր Աստծո, մի եկեք այս հրապարակ, գնացեք որևէ այլ տեղ, ստեղծեք ձեր հարթակը, բայց իրացրեք ձեր հիմնական իրավունքները: Ձեր անգործության պատճառով է նաև, որ այսօրվա իշխանությունը իրեն թույլ է տալիս քաղաքական օրակարգ մտցնել տարատեսակ կենցաղային հարցեր, և փորձում լկտիաբար երկրորդական պլան մղել օրվա համար մեկ հարցը` Արցախյան հիմնախնդրով հայկական երկու պետությունների անունից բանակցողի անհապաղ փոփոխությունը:
Շարժվե´ք ժողովուրդ, վաղը ուշ է լինելու: Ապացուցեք, որ մենք ֆեյքային ժողովուրդ չենք, որ ունենք իրավունք ունենալու հզոր, ժողովրդավար պետություն և հայ մարդուն վայել արժանապատիվ կյանք:
Եթե ժամանակին մեր ավագ սերունդներն իրենց պահեին այնպես ինչպես մեր այսօրվա հասարակությունը, մենք վաղուց կործանվել էինք, բոլոր հնարավոր առումներով:
Ընտրությունը ձերն է, ի վերջո, յուրաքանչյուրն օրվա վերջում իր խղճի հետ է միայնակ մնում:

Վաղը 18:00 ես լինելու եմ Ազատության հրապարակում, ինչպես և գիտակից ամբողջ կյանքիս ընթացքում վեր դասելով պետական շահը անձնականից, քանի որ գիտեմ, որ իմ խիղճն ինձ հանգիստ չի տալու եթե չանեմ այսօր իմ ուժերի առավելագույնը:

Առողջություն, համբերություն և տրամաբանություն բոլորիս: