Ամերիկացի գիտնականները որոշել են կորոնավիրուսի հակամարմինների պահպանման ժամկետը
ՄԻՋԱԶԳԱՅԻՆ
Համաձայն Նյու Յորքի «Mount Sinai» բժշկական կենտրոնի գիտնականների` հետազոտության SARS-CoV-2 կորոնավիրուսով հիվանդացածների մոտ հակամարմինները պահպանվում են մոտ հինգ ամիս։ Այդ մասին գրում է rbc.ru-ն։ SARS-CoV-2 վիրուսի նկատմամբ հակամարմինների մակարդակը մոտ հինգ ամիս պահպանվում է այն մարդկանց մոտ, որոնց մոտ հիվանդությունը ընթացել է թեթև կամ միջին ծանրության:
Բժշկական կենտրոնի գիտնականները իրենց հետազոտության արդյունքները հրապարակել են «Science» ամսագրում: Հետազոտությանը մասնակցել է մոտ 30 հազար մարդ, որոնք նախկինում ունեցել են հաստատված կորոնավիրուս: Գիտնականները նշում են, որ հակամարմինները ունակ են պաշտպանել կրկնավարակից կամ թուլացնել վիրուսը՝ կրկնավարակի դեպքում:
Ավելի վաղ Լոնդոնի կայսերական քոլեջի գիտնականների կողմից իրականացված հետազոտության համաձայն կորոնավիրուսային հիվանդությունից հետո մի քանի ամսվա ընթացքում հակամարմինների քանակը կարող է իջնել այնպիսի մակարդակի, որ ունակ չլինի պաշտպանել օրգանիզմը կրկնավարակումից: Հետազոտողները արձանագրել են հակամարմինների մակարդակի հատկապես արագ անկում նրանց մոտ, ովքեր ունեցել են ասիմպտոմատիկ COVID-19: Հետազոտողները պարզել են նաև, որ հակամարմինները արագորեն անհետացել են 75 և ավել տարիք ունեցող հիվանդների մոտ:
Նյութը հրապարակման պատրաստեց Կամո Խաչիկյանը
