Թուրքիան նպատակ ունի իր ծավալապաշտական նկրտումները հասցնել միջկրոնական բախումների մակարդակի
ՔԱՂԱՔԱԿԱՆՈՒԹՅՈՒՆ
Միջազգայնագետ Վահրամ Պետրոսյանի կարծիքով՝ ժամանակն է, որ Հայաստանը ոչ միայն արձանագրի, որ Արցախի դեմ մղվող թուրք-ադրբեջանական պատերազմը ահաբեկչական բնույթ ունի, որը սպառնում է միջազգային ահաբեկչության դեմ պայքարին, այլև միջազգային ասպարեզում հանդես գա այդ ամենին իրավական գնահատական տալու պահանջի տեսանկյունից:
«Մտահոգություն հայտնելն ու կոնկրետ փաստերին կոնկրետ գնահատական տալը տարբեր բաներ են: Կարևոր է, որ հայկական կողմն ունի ահաբեկիչների ներկայության մասին փաստեր, բայց դրանք հարկավոր է նաև ներկայացնել միջազգային հանրությանը: Պետք է արձանագրեմ, որ մենք այս ուղղությամբ դեռ բավական անելիք ունենք և պետք է մեր քայլերն իրականացնենք միջազգային փաստաթղթերի պահանջների համաձայն»,- ասաց Վ. Պետրոսյանը:
Խոսելով եվրոպական քաղաքներում վերջին շրջանում տեղի ունեցած դեպքերից, մասնավորապես՝ մարդկանց գլուխ կտրելուն, եկեղեցիներ այրելուն, միջազգայնագետի կարծիքով սրանով Թուրքիան նպատակ ունի իր ծավալապաշտական նկրտումները հասցնել միջկրոնական բախումների մակարդակի: Ուստի, մուսուլմանական ուժերի ակտիվացումը նպաստում է այդ ցանկությունների իրականացմանը, որին այսօր ձգտում է հասնել Թուրքիան:
«Թուրքիան նեոօսմանիզմի հայտ է ներկայացնում, որի մեջ ներառված է կրոնական ուղղությունը: Դա է պատճառը, որ միջազգային հանրությունը չի ցանկանում հակամարտությունների ժամանակ արծարծել կրոնական գործոնը: Այլապես մենք կկանգնենք 1990 թվականին, Հանթինգթոնի հեղինակած՝ քաղաքակրթությունների բախման իրողության: Արցախյան հակամարտությանը ևս կրողնական երանգավորում տալը վտանգավոր է, քանի որ այդ ալիքը կարող է ահագնացնել պայքարը: Ուստի, Արցախի դեմ սանձազերծած պատերազմին մոտեցվող կրոնական ալիքը կաշկանդելու համար հարկավոր է կրոնական եզրույթի շրջանառություն թույլ չտալ: Եվ, չնայած, Թուրքիան ամեն կերպ փորձում է կոնֆլիկտի ուղղությունը շեղել, սակայն հարկավոր է ուշադիր լինել: Ուստի, Էրդողանի մեսիջներին պետք է ուշադիր հետևել, քանի որ դրանք հեռուն գնացող, վտանգավոր շեշտադրումներ կարող են պարունակել»,- ասաց Վ. Պետրոսյանը:
Արմինե Գրիգորյան
