Միամտություն կլիներ կարծել, թե այս տարածաշրջանում Թուրքիան չէր գնա սադրանքի. Ռուբեն Մելքոնյան
ՔԱՂԱՔԱԿԱՆՈՒԹՅՈՒՆ
Թուրքագետ Ռուբեն Մելքոնյանի դիտարկմամբ` Արցախի դեմ սանձազերծված պատերազմը ավելի բյուրեղարեց Թուրքիայի կողմից վարվող ապակառուցողական, ահաբեկչական քաղաքականությունը, որը ևս մեկ անգամ ի ցույց դրվեց վերջին մեկ ամսվա ընթացքում: Ըստ նրա՝ Թուրքիայի ձեռագիրը նույնն է՝ բոլոր հնարավոր ճանապարհներով ներխուժել կոնֆլիկտների տիրույթ և ագրեսիա իրականացնելով դառնալ բանակցող կողմ: Այդպես նա ներխուժեց Սիրիա, Լիբիա, իսկ ներկայումս Ադրբեջանի միջոցով ներխուժել է արցախյան կոնֆլիկտի մեջ: Սրանով, Թուրքիան չունենալով բանակցային մանդատ, ամեն կերպ ձգտում է բանակցային սեղանին տեղ զբաղեցնել, որը արդեն չի էլ թաքցնում:
«Սա բացահայտ արհամարհանք է Մինսկի խմբի համանախահագող երկրների նկատմամբ, նաև մարտահրավեր է միջազգայնորեն ճանաչված կոնֆլիկտների կարգավորման նպատակով ձևավորված ձևաչափերին: Թուրքիան տևական ժամանակ է սկսել է աշխարհի շատ երկրներում ռազմաբազաների տեղակայման գործընթաց: Ես կարծում եմ, որ Թուրքիայի և Ադրբեջանի կողմից Արցախի դեմ սանձազերծած պատերազմի գերնպատակը Ադրբեջանում թուրքական ռազմաբազայի կամ ռազմական ներկայության դե ֆակտո լեգիտիմացումն է, որի ուղղությամբ Թուրքիան հաստատուն քայլերով փորձում է առաջ շարժվել: Պատերազմի միջոցով նա փորձ է անում դրան տալ լեգիտիմություն: Ենթադրելի է, որ այդ ռազմաբազաներից մեկը պետք է լինի Կասպից ծովի ավազանում, մյուսը՝ Նախիջևանում: Սա Թուրքիայի կողմից աշխարհին և տարածաշրջանային հավասարակշռությունների խախտմանն ուղղված ևս մեկ մարտահրավեր է, որը տարածաշրջաններում առկա կոնֆլիկտները խորացնելուն, թեժացնելուն և նրա ծավալապաշտական նկրտումները բավարարելուն է միտված»,- ասաց Ռ. Մելքոնյանը:
Թուրքագետի կարծիքով այս ամենն ուղղված է առաջին հերթին Ռուսաստանի դեմ, քանի որ տևական ժամանակ է ռուս-թուրքական բրոքսի պատերազմ է ընթանում այն տարածքներում, որոնք կարևոր են Ռուսաստանի համար: Ուստի, միամտություն կլիներ կարծել, թե այս տարածաշրջանում Թուրքիան չէր գնա սադրանքի:
«Սա նաև գլոբալ մարտահրավեր է Ռուսաստանի դեմ, ինչը դրսևորվում է նաև ահաբեկիչներին այս տարածաշրջան տեղափոխելով: Դա նաև ուղիղ սպառնալիք է Ռուսաստանի անվտանգությանը: Եվ եթե հետ նայենք պատմությանը, ապա իմ կարծիքով Ռուսաստանը այս հարցում ունի պատմական առաքելություն: Ինչ վերաբերում է միջազգային հանրության արձագանքին, ապա այն ավելի քան երեսպաշտության հստակ դրվագներ է պարունակում, որը ինչ-որ տեղ սպասելի էր»,- ասաց Ռ. Մելքոնյանը:
Արմինե Գրիգորյան
