Իրանը աշխարհաքաղաքական գործընթացում սոլիդություն է պահպանում
ՎԵՐԼՈՒԾՈՒԹՅՈՒՆՆԵՐ
Օրերս հայտնի դարձավ, որ Իրանում գործող «Իսլամական հեղափոխության պահապանների կորպուսը» հատուկ ջոկատ և ռազմական տեխնիկա է ուղարկում Լեռնային Ղարաբաղի ու Նախիջևանի հետ սահմանային հատվածներ։ Ըստ էության` Թեհրանը դա անում է երկրի հյուսիսարևմտյան սահմաններին օտարերկրյա ներկայությունից ազգային անվտանգությունը պաշտանելու համար։ Ակնհայտ է, որ Իրանը չի հանդուրժի տարածաշրջանի սահմանների աշխարհքաղաքական փոփոխություններ և դրանում գրեթե ոչ մի կասկած չկա։ Ավելի վաղ հայտնի էր դարձել, որ ԻՀՊԿ հրամանատար Հոսեյն Սալամին եղել է երկրի սահմանին, Խուդաֆերինի հատվածում։
Ըստ էության՝ Արցախի ու Իրանի սահմանին իրադարձությունները զարգանում են ոչ միայն ռազմական առումով, այլ նաև աշխարհքաղաքական։ Իրանը խոսում է աշխարհքաղաքական սահմանների փոփոխության մասին Վաշինգտոնում Հայաստանի ու Ադրբեջանի եռօրյա խորհրդակցություններից հետո, որից հետո նախագահ Թրամփը հայտարարեց, որ կարող է հեշտ լուծել ղարաբաղյան խնդիրը։ Աներկբա է, որ Ադրբեջանն արհամարհել է Վաշինգտոնում պայմանավորված հրադադարը, բայց հակամարտության լուծման առաջարկը, ինչպես նաև տարածաշրջանի երկրների հնարավոր արձագանքը շատ են անհանգստացրել Իրանին։
Փաստացի ներկայումս Թուրքիան է կառավարում Ադրբեջանը և բաց չի թողնի այն կլանելու պահը, եթե ոչ ամբողջությամբ, ապա Նախիջևանը։ Միևնույն ժամանակ, թուրքական ու ադրբեջանական հարթակներում շատ է խոսվում Մեղրիով Նախիջևանի ու Ադրբեջանի ցամաքային կապի հաստատման անհրաժեշտության մասին: Հավելենք, որ 100 տարի առաջ Իրանը գործարքի գնաց Թուրքիայի հետ՝ նրան տրամադրելով նեղ միջանցք Նախիջևանի հետ հաղորդակցության համար։ Այդ միջանցքով Թուրքիան ամրացրել է իր ռազմաքաղաքական ներկայությունը Նախիջևանում, փաստացի հող նախապատրաստելով դրա բռնակցման համար։ Այսօր ունենք ստեղծված մի իրավիճակ, համաձայն որի՝ Իրանը պատրաստվում է իրադարձությունների ցանկացած զարգացման, և Թեհրանը պատրաստ է պաշտպանել իր ներկայիս աշխարհքաղաքական սահմանները։
Անդրանիկ Կիրակոսյան
