Աբխազիայի քաղաքացիները պահանջում են ճանաչել Լեռնային Ղարաբաղի անկախությունը
ՔԱՂԱՔԱԿԱՆՈՒԹՅՈՒՆ
Աբխազիայի քաղաքացիական հասարակության ներկայացուցիչները ելույթ են ունեցել` դիմելով միջազգային ասոցիացիաների և կազմակերպությունների գրասենյակներին՝ կապված Ղարաբաղյան հակամարտության գոտու ռազմական գործողությունների հետ: Նրանք միացել են Լեռնային Ղարաբաղի անկախության ճանաչման վերաբերյալ պահանջներին: Հարկ է նշել, որ դիմումը հրապարակել է «Апсныпресс» պետական տեղեկատվական գործակալությունը:
Փաստաթուղթը ստորագրել են Բատալ Կոբախիան, Արդա Ինալ-Իպան, Լիանա Կվարչելիան, Դիանա Կերսելյան, Նադեժդա Վենեդիկտովան, Նատելլա Ակաբան, Սայիդ Գեզերդավան, Ասիդա Լոմիան, Ալխաս Տխագուշևը, Ինալ Խաշիգը, Մարիետա Թոփչյանը, Ելենա Կոբախիան, Բելլա Տուրվևան, Ելենա Կուվիչկոն, Ազամատ Բագատելիան, Աիդա Լադարիան, Ինա Բարչանը և Ռոզիտա Գերմանը:
Դիմումն ուղարկվել է ՄԱԿ-ի Անվտանգության խորհուրդ, Եվրախորհուրդ, Եվրախորհրդարան և Հարավային Կովկասում ԵՄ հատուկ ներկայացուցչի գրասենյակ:
Ստորև ներկայացնում ենք Աբխազիայի քաղաքացիական հասարակության ներկայացուցիչների դիմումի հիմնական մասը.
«Ամբողջ աշխարհը տագնապով և անհանգստությամբ հետևում է Ղարաբաղյան հակամարտության գոտուց ստացվող, զինվորականների և խաղաղ բնակչության մահվան վերաբերյալ, ճնշող լուրերին: Զոհված զինվորներից շատերը հազիվ 20 տարեկան երիտասարդներ էին:
Հարավային Կովկասում ինքնորոշման իրավունքի ճանաչման միջոցով հակամարտության կարգավորման ուղին մերժվում է՝ չնայած աշխարհում գոյություն ունեցող նախադեպերին, օրինակ՝ Կոսովոյին:
Այսօր մենք տեսնում ենք՝ Ղարաբաղում ինչ ուժով է կրկին բռնկվել պատերազմը, և որքան արագ է կատարվում ռազմական գործողությունների միջազգայնացում, հակամարտության մեջ տարածաշրջանային նոր խաղացողների ներգրավում, ինչը հղի է տեղական հակամարտության սահմաններից դուրս աղետի գոտու ընդլայնումով:
Այս պայմաններում միջազգային ազդեցության բոլոր միջոցները պետք է ուղղված լինեն ռազմական գործողությունների անհապաղ դադարեցմանը: Միջազգային հանրությունն արդյունավետ խաղաղ գործընթացի խթանման միջոցներ և մեխանիզմներ ունի, առաջին հերթին՝ տնտեսական և քաղաքական պատժամիջոցներ, որոնք հաճախ և լայնորեն կիրառվում են պակաս կրիտիկական իրավիճակներում:
Հանուն այս անվերջ պատերազմում զոհվող հայերի և ադրբեջանցիների՝ անհրաժեշտ է անհապաղ սկսել բանակցությունները, որոնց անպայման պետք է մասնակցի Ղարաբաղը: Առանց հակամարտող կողմերի միջև երկխոսության, բանակցությունները դառնում են թերի և անհեռանկարային և ընդունակ չեն հանգեցնել փոխըմբռնման և խաղաղության:
Անթույլատրելի է, որ հակամարտության կողմերից մեկը զուրկ լինի ձայնի իրավունքից: Այդ պատճառով ողջ աշխարհում ավելի հաճախ են սկսել պահանջներ հնչել Ղարաբաղի անկախության ճանաչման վերաբերյալ: Մենք միացնում ենք մեր ձայնը այդ պահանջներին: Միևնույն ժամանակ, հասկանում ենք, որ ճանաչմանը պետք է հետևի կուտակված բազմաթիվ վիճելի հարցերի քննարկում՝ բանակցային գործընթացի շրջանակներում, որը պետք է աջակցվի ողջ աշխարհի կողմից և շարունակվի մինչև փոխընդունելի լուծման հասնելը:
Բոլորն, ովքեր ներգրավված են Հարավային Կովկասի հակամարտությունների կարգավորման գործընթացում, պետք է գիտակցեն իրենց պատասխանատվությունն ավելի ու ավելի շատ զոհեր պահանջող Խորհրդային Անդրկովկասի ուրվականներին արհեստականորեն աջակցելու հարցում:
Հանուն կյանքերի, որոնք դեռ կարելի է փրկել, մենք դիմում ենք բոլոր երկրներին և կազմակերպություններին, որոնցից այսօր կախված է Հարավային Կովկասի ժողովուրդների ճակատագիրը, կոչով՝ չխոչընդոտել Կովկասում պատմության բնական ընթացքին՝ հանուն թարմացման, զարգացման և խաղաղության»:
Նյութը հրապարակման պատրաստեց Լիլիթ Ամիրաղյանը
