Մենք այս պահին անհանգստանալու պատճառ չունենք
ՀԱՍԱՐԱԿՈՒԹՅՈՒՆ
1or.am կայքի զրուցակիցը համաճարակաբան Մարինե Խաչատրյանն է։
— Տիկին Խաչատրյան, վերջին մի քանի օրերին կարծես կորոնավիրուսի թվերը կրկին ավելացել են։ Ի՞նչ եք կարծում հա համավարակի տարածման երկրորդ ալիքն է։
— Կարծեմ ես ևս մեկ անգամ նշել էի, որ ցանկացած վիրուսային հիվանդություն ունենում է երկրորդ ալիք, երրորդ ալիք և այլն։ Մենք այս պահին անհանգստանալու պատճառ չունենք, որովհետև բնակչության զգալի մասը արդեն վարակվել է։ Շատ շատերը ովքեր որ հիվանդացել են, արդեն երկրորդ անգամ են հիվանդանում և մենք արդեն ունենք իմունային համակարգ և շատ անհանգստանալու բան չկա։ Հատկապես հիմա մենք ավելի շատ պետք է մտածենք այն երիտասարդ տղաների համար, ովքեր հիմա սահմանին կռվում են հայրենիքի համար։
— Պատերազմական իրավիճակ է Հայաստանում և այս իրավիճակը ստիպեց ժողովրդին երկրորդ անգամ երրորդ պլան մղել համավարակի կանոնների պահպանումը։ Արդյոք այդ կանոնները չպահպանելը չի նպաստել այս թվերի կտրուկ աճին։
— Ես չեմ կարծում, որ մինչև պատերազմը կանոնները լրիվ պահպանվել են, որովհետև բնակչության մեծ մասը դիմակը դրել է կամ քթի տակ կամ ծնոտին և դա, միանշանակ, կանոն պահպանել չի, ես վստահ եմ նաև, որ շատերը իրենց ձեռքերը 15 րոպե կամ մեկ ժամ պարբերականությամբ չեն լվացել և չեմ կարծում, որ ինչ-որ կանոնների պահպանման հարց է։ Պարզապես վիրուս է, որը պետք է լինի։ Ցանկացած վիրուսային հիվանդություն ունի իր սեզոնայնությունը և այս պահին գրիպն էլ է տարածվելու, հերպեսային հիվանդություններն էլ են ի հայտ գալու։ Մենք ունենք 8 տեսակի հերպես վիրուսային վարաքներ, որոնք շատ շուտով գլուխ կբարձրացնեն։ Ու եթե մենք սկսենք դրանք էլ հետազոտել, ապա կտեսնենք, որ կորոնավիրուսի թվերին գերազանցում են։ Ցանկացած վիրուսային հիվանդություն ունի իր վտանգները և այստեղ միայն կորոնավիրուսը չի, որի համար մենք պետք է անհանգստանանք, կա ավելի բարդ վիրուս՝ գրիպի վիրուսը, որը ավելի շատ վնասում է երեխաներին, որովհետև գրիպի վիրուսը երեխաների մոտ շատ արագ բերում է թոքաբորբի, ինչը երեխաների համար ավելի վտանգավոր է։ Պետք չի կենտրոնանալ կորոնավիրուսի վրա և պետք է համակերպվել, որ այդ վիրուսը արդեն կա և մենք ապրելու ենք իր հետ մեր ամբողջ կյանքում։
Սոնա Գիշյան
