ՌԴ ՊՆ-ն անհանգստացած է ԼՂ-ում վարձկանների ներկայությամբ և ակտիվ մասնակցում է իրավիճակի կայունացման գործընթացին

Ռուսաստանի Դաշնության պաշտպանության նախարարությունն ակտիվ մասնակցություն է ցուցաբերում Լեռնային Ղարաբաղում հակամարտության գոտում իրավիճակի կայունացման գործում, ինչի մասին, ըստ ՏԱՍՍ գործակալության, հայտնել են նախարարությունից:

«Ռուսաստանի պաշտպանության նախարարությունն իր իրավասությունների սահմաններում ակտիվ մասնակցություն է ցուցաբերում ՌԴ նախաձեռնության իրականացմանը, այն է՝ Լեռնային Ղարաբաղում իրավիճակի շուտափույթ կայունացմանը»,- նշել են նախարարությունում:

Մասնավորապես, պաշտպանության նախարար Սերգեյ Շոյգուն այս հարցի վերաբերյալ բանակցություններ է վարել տարբեր երկրներից իր գործընկերների հետ:

«Այս աշխատանքի գլխավոր նպատակը Լեռնային Ղարաբաղում մարտական գործողությունների անհապաղ դադարեցումն է և տարածաշրջանում իրավիճակի կարգավորման համար հակամարտող կողմերի միջև բանակցություններին անցումը»,- ընդգծել են նախարարությունում:

Գերատեսչությունում անհանգստացած են Մերձավոր Արևելքից ահաբեկչական խմբավորումների գրոհայիններին ԼՂ-ում հակամարտության տարածք ուղարկելու մասին տեղեկությամբ:

«ՌԴ պաշտպանության նախարարությանն առավել անհանգստացնում է տեղեկությունն այն մասին, որ Լեռնային Ղարաբաղում հակամարտության գոտի են բերվում Մերձավոր Արևելքից ահաբեկչական խմբավորումների գրոհայիններ»,- հայտնել են նախարարությունում:

Հաղորդվում է նաև, որ այդ անհանգստությունը պաշտպանության նախարար Սերգեյ Շոյգուն հայտնել է Թուրքիայի ռազմական գերատեսչության ղեկավար Հուլուսի Աքարի հետ հեռախոսային բանակցությունների ընթացքում:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 13-ի դրությամբ Արցախի զինուժը խոցել է հակառակորդի՝ 16 ուղղաթիռ, 18 ինքնաթիռ, 173 անօդաչու թռչող սարք, 521 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 5139 զոհ։ Հայկական կողմից, նախնական տվյալներով, կա 542 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։