Եթե ԱԺ ընտրություններն առաջիկա կիրակի օրը լինեին, Ն.Փաշինյանի կուսակցությունը չէր անցնի

Տպավորությունն այնպիսին է, որ հայկական քաղաքական իրականությունում առաջարկն ավելի շատ է, քան պահանջարկը: Եվ եթե լավ ուսումնասիրենք, գուցե հայոց այբուբենի հնարավոր բոլոր կոմբինացիաներով էլ որևէ կուսակցություն գտնենք, բայց խնդիրն այն է, թե որ կուսակցությունն է առավել կենսունակը և այդ բազմազանության մեջ որն ինչով կարող է առավել գրավիչ լինել սովորական քաղաքացու համար:

Սեփական ուժերով իրականացված սոցիոլոգիական հարցումները, սակայն, ցույց տվեցին, որ եթե 10-15 տարի առաջ ընդդիմադիր դաշտում բավական ակտիվ կուսակցություններն արդեն մոռացվել են, ապա նորաստեղծ կուսակցությունների մասին տեղեկություններն առավել թարմ են և ստույգ, քանի որ դրանց մասին գրեթե բոլորը և՛ լսել էին, և՛ գիտեին, թե ով է այն ղեկավարում:
Հարցման մասնակիցները, ի թիվս այլ հարցերի, պատասխանել են նաև, թե իրենք ո՞ր կուսակցությանը նախընտրություն կտային հարցին, եթե ընտրություններն առաջիկա կիրակի օրն անցկացվեին կամ, այլ կերպ ասած, ում կընտրեին: Ուշագրավ էր, որ հարցմանը մասնակցածները նորաստեղծ կուսակցությունների մասին ոչ միայն տեղյակ են, այլև նույնիսկ վստահում են ու պատրաստվում են ձայն տալ:
Սոցիոլոգիական ուսումնասիրության արդյունքում պարզ դարձավ, որ «Քաղաքացիական պայմանագիր», «Հայկական վերածնունդ» և «Լուսավոր Հայաստան» կուսակցություններից ՔՊ կուսակցությանը ճանաչում է մոտ 7,1 %-ը, ՀՎ-ին՝ 14 %-ը, իսկ ԼՀ-ին՝ մոտ 11%-ը, ու եթե առաջիկա կիրակի օրը տեղի ունենային ԱԺ ընտրությունները, ապա ՔՊ-ին ձայն կտար հարցվածների 2,1 %-ը, ՀՎ-ին՝ 4,3 %-ը, իսկ «Լուսավոր Հայաստան» կուսակցությանն իրենց ձայնը կտա հարցվածների 5,1 %-ը:
Ի դեպ, ուշագրավ էր այն, որ ի, տարբերություն մնացած կուսակցությունների, հարցվածները նշում էին, որ Էդմոն Մարուքյանի ղեկավարած կուսակցությանը վստահում են մի քանի պատճառով:
Նախ՝ նրա համար, որ նա բավականին ակտիվ պայքարում է ոչ միայն ԱԺ-ում, այլև այլ հարթակներում: Մասնավորապես, նշում էին «Հայաստանի էլեկտրական ցանցեր» ՓԲԸ-ի կողմից թույլ տրված ապօրինությունների դեմ պայքարը, որի արդյունքում օրերս ՀԾԿՀ-ն 5 մլն դրամով տուգանեց ՀԷՑ-ին:
Հիշեցնենք, որ ՀԾԿ հանձնաժողովը վարույթ էր սկսել ԱԺ պատգամավոր Էդմոն Մարուքյանի գրության հիման վրա, որով հանձնաժողովին էր փոխանցել բազմաթիվ քաղաքացիների բողոքն այն մասին, որ էլեկտրաէներգիայի հաշվիչների գիշերային ժամանակ իրական ժամանակից մի քանի ժամ հետ է մնում, ինչի հետևանքով քաղաքացիները գիշերը սպառած էլեկտրաէներգիայի դիմաց վճարել և վճարում են ցերեկային սակագնով: ՀԾԿՀ ուսումնասիրություններն էլ էին ցույց տվել, որ դիմումը հիմնավոր է, այդ պատճառով էլ որոշում էր կայացվել տուգանել ՀԷՑ-ին:
Այնպես որ, քաղաքցիական հասարակությունն արդեն սկսել է ոչ թե մարդկանց պոպուլիստական ելույթներին հավատալ, այլ գործերին և այս անգամ արդեն ճոխ բառապաշարով ու սուր ելույթներով մարդկանց գայթակղելուց բացի, հարկ կլինի նաև հասարակությանը ցույց տալ, թե խոսելուց բացի կուսակցություններն ինչ կոնկրետ գործեր են կարողացել իրականացրել:

Ա.Գրիգորյան