Առաջիկա օրերին միջազգային հանրությունը բոլորովին այլ կերպ կարձագանքի այս ամենին. Սարո Սարոյան
ՔԱՂԱՔԱԿԱՆՈՒԹՅՈՒՆ
Վերջապես մեր դիվանագիտությունը խոշոր հաղթանակ տարավ: Այս մասին ֆեյսբուքյան իր էջում գրել է ՀՀ վարչապետ Նիկոլ Փաշինյանը՝ հավելելով, որ միջազգային հանրությունը հստակ արձանագրեց՝ ադրբեջանա-թուրքական տանդեմը Արցախի ու Հայաստանի դեմ կռվում է վարձկան-ահաբեկիչների օգնությամբ։
«Այսպիսով՝ արցախյան առաջնագիծը դառնում է քաղաքակրթական առաջնագիծ։ Արցախը կռվում է միջազգային ահաբեկչության դեմ, որի թիրախները տարանջատված չեն աշխարհքաղաքական սահմաններով։ Այդ ահաբեկչությունը հավասարաբար սպառնում է ԱՄՆ-ին ու Իրանին, Ռուսաստանին ու Ֆրանսիային, եւ Արցախը, Հայաստանը, հայ ժողովուրդը կռվում են հանուն գլոբալ անվտանգության»,- եզրափակել է վարչապետը:
Քաղաքական վերլուծաբան Սարո Սարոյանն անդրադառնալով այս ձևակերպումներին` 1or.am-ի հետ զրույցում նշեց, որ պատերազմը սկսելուց անմիջապես հետո ակնհայտ էր, որ մեր բանակը շատ լավ է պատրաստված և ռազմական գործողությունները վարում է ռազմագիտական բոլոր կանոնների համաձայն: Ակնհայտ էր նաև, որ դիվանագիտական դաշտում կար որոշակի վակուում աշխարհին առկա իրողությունները ժամանակին ներկայացնելու և միջազգային ասպարեզում հանրային տրամադրությունները ուղղորդելու հարցում:
«Նկատելի էր, որ այն հաջողությունները, որոնք գրանցվում էին պաշտպանական մարտերի ընթացքում, համահունչ չէին դիվանագիտական դաշտում՝ դիվանագիտական կորպուսների աշխատանքի տեսանկյունից: Կարիք կար մեր կողմից վարվող քաղաքականությունը բանակի հաջողություններին համահունչ արտաքին աշխարհին ներկայացնել: Սակայն, երեկ տեղի ունեցավ որոշակի բեկում, որը և արձանագրվեց Նիկոլ Փաշինյանի կողմից»,- ասաց Ս. Սարոյանը:
Քաղաքագետի դիտարկմամբ՝ մի կողմից կարիք կար աշխարհին ներկայացնել, թե իրականում ով է սկսել այս պատերազմը և մյուս կողմից պետք էր աշխարհի ուշադրությունը հրավիրել այն հանգամանքի վրա, թե Հայաստանն ու Արցախը իրականում ում կամ ինչի դեմ են կռվում:
«Իրականում մենք պայքարում ենք ահաբեկչության դեմ և կարևոր էր դա արձանագրելը: Այսինքն՝ այդ բեկում ասվածը, դա է: Արդեն իսկ պարզ երևում է, որ միջազգային հանրության կողմից ընկալելի է դառում թե մենք ինչի դեմ ենք կռվում, որը շատ էական դիրքեր կապահովի առաջիկայում մեզ համար: Եվ, քանի որ ահաբեկչությունը սպառնալիք է ողջ աշխարհի համար, աշխարհը Ադրբեջանին ընկալեց որպես ահաբեկչություն իրականացնող և ահաբեկչությանը խթանող պետություն: Եվ փաստորեն, պարզ դարձավ, որ մենք ահաբեկչության դեմ ենք ներկայում պայքարում: Սա դիվանագիտական առումով բավականին ողջունելի ձեռքբերում է և կարող ենք վստահաբար ասել, որ այդ դաշտում մենք ունեցանք որոշակի հաջողություն»,- ասաց Ս. Սարոյանը:
Բացի այդ, ըստ քաղաքագետի, միջազգային հանրության համար ընկալելի դարձավ նաև, որ մեր բանակը մի քանի անգամ ավելի մարտունակ է, քան ադրբեջանական բանակը, որը, անգամ Թուրքիայի և միջազգային ահաբեկչական խմբերի օժանդակությամբ չի կարողանում որևէ խնդիր լուծել: Այս ամենի արդյուքնում միջազգային հանրության կողմից Հայաստանն այլևս չի ընկալվի որպես ինչ-որ երկրի փոքր եղբայր կամ հովանավորյալ երկիր, ինչը ևս շատ կարևոր է:
«Ակնհայտ է, որ առաջիկա օրերին միջազգային հանրությունը բոլորովին այլ կերպ կարձագանքի այս ամենին: Եվ այստեղ որևէ կասկած պետք չէ ունենալ»,- ասաց Ս. Սարոյանը:
Արմինե Գրիգորյան
