Մարտական գործողությունների ելքը դժվար է կանխատեսել, կան տարբեր տարբերակներ, որոնք կարող են փոխել պատերազմի ընթացքը
ՔԱՂԱՔԱԿԱՆՈՒԹՅՈՒՆ
1or.am կայքը Արցախյան սահմանային լարվածության հետ կապված զրուցել է ռազմական փորձագետ Դավիթ Հարությունովի հետ, հասկանալու համար թե ինչ է կատարվում այս պահին սահմանին։ Հարցին թե այսօր ինչ իրավիճակ է Արցախյան ողջ սահմանային երկայնքով փորձագետը պատասխանել է․
«Ռազմական տեղեկատվություն, որը տարբերվում է պաշտոնական տեղեկատվությունից ես չեմ տիրապետում և կարելի է ինչ-որ սահմանափակ եզրակացություններ անել: Ըստ երևույթին այդ առաջին հարվածը, որը եղավ Ադրբեջանի կողմից, չարդարեցրեց իրենց սպասելիքները, այսինքն իրենք եթե փորձում էին որևէ կերպ ճեղքել մեր պաշտպանությունը՝ չստացվեց, եթե անգամ որոշ հատվածներում դա տեղի է ունեցել, ապա այդ ամենը վերականգնվել է և հայկական կողմը կարողանում է պահել առաջնագիծը և շարունակում է էֆեկտիվորեն աշխատել։ Եվ մենք հիմա տեսնում ենք, որ մարտերը դիրքային բնույթ են կրում և այսօր գիշերվա և առավոտվա տեղեկությունները խոսում են այն մասին, որ ադրբեջանական կողմը փորձում է դուրս գալ փակուղուց։ Եվ նրանք կիրառում են բոլոր այն միջոցները, որոնք մինչ այս չեն կիրառել։ Այս պահին այսքանը կարող եմ ասել, իսկ մնացածը սպասենք հերթական լրահոսին»։
Անդրադառնալով այն հարցին թե ինչպիսին կլինի այս պատերազմի ելքը Պարոն Հարությունովը ասաց․
«Մարտական գործողությունների ելքը դժվար է կանխատեսել, կան տարբեր տարբերակներ, որոնք կարող են փոխել պատերազմի ընթացքը»։
Փորձագետից փորձեցինք ճշտել նաև թե ինչ կարծիք ունի հայկական սահմանի լարվածության վերաբերյալ։ Հարցին, թե այսօր ՀՀ տարածքում, Վարդենիսի հատվածում ադրբեջանական կողմի հրետակոծության մասով ի՞նչ արձագանք պետք է լինի ՀՀ ռազմական դաշնակից Ռուսաստանի կողմից, քանի որ ի տարբերություն Արցախի Հանրապետության Հայաստանի հետ Ռուսաստանը ունի պայմանագիր և այս դեպքում այլ արձագանք պետք է սպասել Ռուսաստանից, փորձագետը պատասխանեց․
«Այստեղ կա երկու խնդիր։ Մեկը տեխնիկական է, իսկ մյուսը քաղաքական։ Տեխնիկական մասով կարող եմ ասել, որ այդ բոլոր պայմանագրերը, որոնք կան Ռուսաստանի և Հայաստանի միջև ՀԱՊԿ-ի շրջանակներում, ենթադրում է որոշակի ակտիվություն հայկական կողմից։ Այսինքն Հայաստանը պետք է դիմի, որ ինքը ենթարկվել է հարձակման և նոր լինի արձագանք։ Եվ այս պահին Հայաստանը չի գնում դրան, չնայած, որ նշում է այդ հնարավորության մասին։ Դա պայմանավորված է նաև նրանով, որ այդ ռազմական վտանգը, որը կա Հայաստանում, դեռ այն մակարդակի չի, որ Հայաստանը չկարողանա լուծել։ Այստեղ կա նաև քաղաքական գործոնը, միանշանակ երևում է, որ ռուսական արձագանքը, ոչ միայն այս հարձակման դեպքի, այլ առհասարակ իրադարձությունների վրա, համեմատաբար ցածր մակարդակի վրա է, ու ես այստեղ տեսնում եմ երկու պատճառ, մեկը այն է, որ ռուսական կողմը սպասում է երկու կողմերը սպառեն ռազմական տարբերակները և նոր միայն միջամտի բանակցային գործընթացին, եվ երկրորդը կա որոշակի ճնշում գործադրելու գործոն և հայկական և ադրբեջանական կողմի վրա։ Այսինքն իր արձագանքը որոշ չափով ձգելով և ուշացնելով, Ռուսաստանը փորձում է ցույց տալ իր միանշանակ լինելը և նաև լուծել որոշակի պոտենցյալ խնդիրներ։ Փաստացի երկու կողմ էլ կախված է այդ միջնորդությունից»։
Սոնա Գիշյան
