Ռուսաստանի կոչը առաջին հերթին ուղված է Թուրքիային
ՔԱՂԱՔԱԿԱՆՈՒԹՅՈՒՆ
1or.am կայքի զրուցակիցը քաղաքագետ Ալեքսանդր Մարգարովն է։
— Պարոն Մարգարով, Ռուսաստանը Արցախի հարցում բոլոր ներքին ու արտաքին խաղացողներին առավելագույն զսպվածության կոչ է արել: Ի՞նչ է ենթադրում այս կոչը։
— Առաջին հերթին տվյալ կոչը ենթադրում է, որ այն քաղաքական ուժը, որը դրդում է Ադրբեջանին սկսել լարվածությունը՝ խոսքը գնում է Թուրքիայի մասին, պետք է ցուցադրի համապատասխան վարք և ոչ թե իր անտեղի վարքի դրսևորումը Հարավային Կովկասում, որտեղ Թուրքիան ցուցադրեց իրեն որպես անկայունության չեմպիոն և միջին արևելքում, և Միջերկրական ծովում, և Հյուսիսում, և փորձում են նույնն անել նաև հարավում։ Եվ առաջին հերթին այս զսպվածության կոչը վերաբերում է Թուրքիային։ Մյուս կողմից կա ագրեսոր կողմը՝ Ադրբեջանը։ Եվ այն հայտարարությունը, որը տարածվում է Ռուսաստանի մի շարք պաշտոնյաների կողմից, լինի դա Մեդվեդեվը, լինի դա պետական դումայի հայտարարությունը, լինի դա Կիրկորովը նրանք բոլորը գիտեն իրենց հայտարարության հասցեատիրոջը, այն հասցեատերը, տվյալ պարագայում կողմը, որը սկսել է տվյալ ագրեսիան։
—Ինչպե՞ս եք գնահատում միջազգային արձագանքը:
— Միջազգային արձագանքի հետ կապված կարելի է նշել մի քանի փաստ։ Առաջինը այս անգամ այդ արձագանքը ի տարբերություն 2016թ․-ի կամ հուլիսյան դեպքերի եղել է բավականին արագ, հաշվի առնելով նաև այն, որ Ադրբեջանը այս ռազմական գործողությունները սկսել է կիրակի օրը։ Երկրորդը, այս միջազգային արձագանքը, բացառությամբ Թուրքիայի և իրենց հետ քայլ անող Պակիստանի և Աղվանստանի, հիմնականում ունի մեկ կոնկրետ ուղղություն՝ դադարեցնել ռազմական գործողությունները և վերսկսել բանակցային գործընթացը և գտնել խաղաղ բանակցությունների լուծումը։ Այս իմաստով բոլոր կողմերը, բնականաբար, ցուցաբերում են իրենց կոնսոլիդացված դիրքորոշումը և բնական է, որ տվյալ պարագայում նաև անհրաժեշտ է ոչ միայն կողմերին կոչ անել զսպվածության և բանակցություններ շարունակելու, այլ նաև դատապարտել Ադրբեջանի վարքը, որովհետև այս անդրդվելիության միջավայրը, որը իրեն թվաց, որ գոյություն ունի 2016-ից, որոշ չափով և հուլիսյան դեպքերից հետո, նաև հանդես է գալիս որպես պատճառ թե ինչու Ադրբեջանը սկսեց այս գործընթացը։
Սոնա Գիշյան
