Առողջական ինչ վտանգավոր խնդիրների ախտանշան կարող է լինել բերանի խոռոչի չորությունը
ՖՈՏՈ
Բերանի խոռոչում չորության զգացողությունը, որը պայմանավորված չէ բավարար քանակությամբ ջուր չօգտագործելու, սննդակարգի առանձնահատկությունների կամ խումարի հետ, կարող է պայմանավորված լինել որոշակի հիվանդություններով, այդ թվում նաև բավական վտանգավոր խանգարումներով։
Ինչպես գրում է MedikForum.ru կայքը, այս ախտանշանը հաճախ ասոցացվում է շաքարային դիաբետի հետ։ Այս դեպքում օրգանիզմը փորձում է ազատվել արյան մեջ պարունակվող ավելորդ շաքարից առատ միզազատության միջոցով, ինչն էլ հանգեցնում է մշտական ծարավի զգացման ու բերանի խոռոչում չորության զգացողության առաջացման։ Սակայն շաքարային դիաբետը միակ հիվանդությունը չէ, որը կարող է դրսևորվել այս տհաճ ախտանշանով։
Ռեսպիրատոր (շնչառական) վարակներ
Սուր շնչառական վիրուսային վարակները հաճախ ուղեկցվում են մարմնի ջերմաստիճանի բարձրացմամբ, ինչը հանգեցնում է օրգանիզմի ջրազրկման ու դառնում լորձաթաղանթների չորացման։ Այս դեպքում խնդիրն էլ ավելի է վատթարանում բերանըմպանի բորբոքման դեպքում։
Երիկամների հիվանդություններ
Այս հիվանդություններն ուղեկցվում են օրգանների գործառույթների խանգարմամբ, ինչի հետևանքով դրանք չեն կարողանում պահպանել ջրի և աղի բալանսը։ Այլ կերպ ասած՝ջուրը չի մնում օրգանիզմում, ինչն իր ազդեցությունն է ունենում բերանի խոռոչի վրա։
Աուտոիմունային հիվանդություններ
Բերանի խոռոչի չորության պատճառ կարող են դառնալ նաև ռևմատոիդ արթրիտը, վահանագեղձի հիվանդությունները (թիրեոտոքսիկոզ), գայլախտը և աուտոիմունային այլ հիվանդությունները, որոնց դեպքում իմունային համակարգը հարձակվում է օրգանիզմի առողջ բջիջների վրա։
Աղեստամոքսային տրակտի խանգարումներ
Աղեստամոքսային տրակտի խանգարումները նույնպես կարող են դրսևորվել բերանի խոռոչի չորությամբ։ Այս դեպքում խնդրի մասին է հուշում նաև տհաճ, դառը կամ թթու համի առկայությունը։
Այլ վտանգավոր հիվանդություններ
Գոյություն ունեն նաև այլ վտանգավոր խանգարումներ, որոնք դրսևորվում են բերանի խոռոչի հյուսվածքների չորությամբ։ Դրանց շարքին են դասվում ՄԻԱՎ-ն ու ՁԻԱՀ-ը, երկաթ պակասորդային սակավարյունությունը (անեմիա), Ալցհեյմերի հիվանդությունը, Պարկինսոնի հիվանդությունը, ռևմատոիդ արթրիտը և այլն։ Ավելին՝ այս տհաճ ախտանշանը կարող է գլխուղեղի կաթվածի բարձր հավանականության մասին հուշող նախանշան լինել, ուստի այն ոչ մի դեպքում չի կարելի անուշադրության մատնել։
