Հայտնի է ծերունական թուլամտությունից խուսափելու միջոցը
ՀԱՍԱՐԱԿՈՒԹՅՈՒՆ
Իսպանիայի Օբերտա դե Կատալոնիա և Պոմպեու Ֆաբրա համալսարանների գիտնականները պարզել են, որ երկու լեզուների միանման տիրապետումը նվազեցնում է ծերացման հետ կապված ճանաչողական խանգարումների ռիսկը: Թուլամտությունից պաշտպանվելու միջոցի մասին հաղորդվել է «Neuropsychologia» թերթի հոդվածում:
Հետազոտություններին մասնակցել է 63 առողջ մարդ, հիշողության տարբեր թեթև խանգարումներով 135 պացիենտ և ծերունական թուլամտության անբուժելի ձևով՝ Ալցհայմերի հիվանդությամբ, տառապող 68 մարդ: Բոլոր կամավորները եղել են Բարսելոնայի՝ իսպաներենի և կատալոներենի կիրառման հաճախականությամբ իրարից տարբերվող թաղամասերից: Մասնագետները որոշել են երկու լեզուների տիրապետման մակարդակը և վերլուծել նյարդաբանական խանգարումների և տարիքի հետ դրսևորվող ախտանշանների ախտորոշման միջև եղած կապը:
Մասնակիցները նաև հիշողության և ճանաչողական այլ գործառույթների թեստեր են անցել: Պարզվել է, որ լեզուների տիրապետման բարձր մակարդակը կապված է չափավոր, և ոչ՝ ուժեղ կոգնիտիվ խանգարումների հետ: Մի լեզվից մյուսին պարբերական անցումը նպաստում է ճանաչողական կառավարման համակարգի պահպանմանը, որը մարդուն օգնում է՝ ընթացիկ առաջադրանքներին համապատասխան, տարբեր գործողություններ կատարել: Սա օգնում է փոխհատուցել հիշողության խանգարումներն ու գլխուղեղի հիվանդությունների այլ ախտանշանները:
Նյութը հրապարակման պատրաստեց Լիլիթ Ամիրաղյանը
