ՊԵԿ նոր որոշումը կմնա անփոփոխ
ՀԱՍԱՐԱԿՈՒԹՅՈՒՆ
ՊԵԿ նախագահի տեղակալ Շուշան Ներսիսյանը 1or.am-ի հետ զրույցում անդրադառնալով կոշիկ և հագուստ ներկրողների բողոքին նշեց, որ նոր օրենքի փոփոխությունը կարևոր էր, քանի որ թույլ կտա ներկրողների բեռի ճշգրիտ հայտարարագրում իրականացնել և հետագայում հարկային դաշտում և շուկայում առկա ապրանքատեսակների ճշգրիտ հաշվառում իրականացնել:
«Եթե խոսում ենք արդար և թափանցիկ տնտեսվարության մասին, ապա պետք է հնարավոր լինի ներկրվող ապրանքների հետագծելիություն ապահովել: Կիլոգրամով ապրանք ներմուծելու դեպքում դժվար է այդ հետագծելիությունն ապահովել և պատշաճ հարկային վարչարարություն իրականացնել»,- ասաց Շ. Ներսիսյանը:
Խնդիրն այն է, որ կիլոգրամով ներմուծելու դեպքում դաշտում եղել է մի իրավիճակ, երբ այն ներմուծողը, որը չի ունեցել այդ արտոնությունը, վնաս է կրել, քանի որ նույն գնային դաշտում աշխատելով ավելի քիչ եկամուտ է ունեցել: Ուստի, այս որոշմամբ բավականին հարցեր կլուծվեն, քանի որ ՊԵԿ-ի խնդիրը ոչ միայն բոլոր տնտեսվարողների համար հավասար պայմաններ ապահովելն է, այլև դաշտում ճշգրիտ հայտարարագրում իրականացնելուն օժանդակելը: Բացի այդ, այս քայլով կխթանվի նաև տեղական արտադրանքի մրցունակությունը, քանի որ ներմուծված ապրանքի համեմատ այն այդքան էլ մրցունակ չէ: Մոտավոր հաշվարկները ցույց են տալիս, որ նոր պայմաններով ներմուծման դեպքում մաքսազերծման համար տնտեսվարողները 1,5-2 անգամ ավել կվճարեն, բայց, ըստ ՊԵԿ-ի հաշվարկների, դա այն գումարը չէ, որը կարող է զգալի ազդեցություն ունենալ շուկայի վրա: Տնտեսվարողների բազմաթիվ հանդիպումների արդյունքում պարզ է դարձել, որ նրանք ցանկանում են շարունակել կիլոգրամով մաքսազերծել իրենց ապրանքը, բայց այդպես շարունակել այլևս հնարավոր չէ, նշեց, ՊԵԿ նախագահի տեղակալը:
«Մի օր պետք է այդ ամենին վերջ դրվեր, և այս օրը սեպտեմբերի 1-ն էր»,- ասաց Շ. Ներսիսյանը:
Ավելացնենք նաև, այս մասին տնտեսվարողներն իրազեկված են եղել դեռ անցյալ տարվա հոկտեմբերից: Բացի այդ, արդեն երեք անգամ այդ ժամկետը երկարաձգվել է, այդ իսկ պատճառով ժամկետներն այլևս չեն վերանայվի:
Ասյա Սարգսյան
