Ավիացիոն ոլորտի մասով պարոն Փաշինյանին շատ վատ են իրազեկում
ՀԱՍԱՐԱԿՈՒԹՅՈՒՆ
1or.am կայքի զրուցակիցը ավիացիոն փորձագետ Նավիկ Խաչատրյանն է։
— Պարոն Խաչատրյան, ՌԴ մեկնել ցանկացողների համար ի՞նչ կարող էին անել իշխանությունները հարցին լուծում տալու և ավիաընկերությունների կողմից նրանց մուտքը Ռուսաստան կազմակերպելու համար։
— Եթե այս իշխանությունը որևէ բան կարողանար անել, ապա պետք է վերլուծություններ աներ և տեսներ, որ ավիացիոն շուկայի մոտ 70%-ը ռուսներինն է։ Դա նախկին ռեժիմների գործելավոճն էր և ամեն ինչ հանձնեցին։ Այս հեղափոխությունից հետո միակ հնարավորությունը դրա դեմ պայքարելու ԵԱՏՄ կառույցի մեջ հարց բարձրացնելն էր։ Իսկ այն ինչ հիմա ունենք, դրա համար ոչ մի այլ տարբերակ չկար մեր իշխանությունները չեն խնդրելու կամ պահանջելու։ Ռուսաստանը լինելով բարեկամ երկիր փակել է սահմանները, իսկ այստեղի մարդիկ չնայած, որ վատ վիճակում են հայտնվել, սակայն ստիպված են բոլորի նման սպասել։ Այստեղ նաև կա մեկ այլ խնդիր, թե ինչու պետք է հայերը այս իրավիճակում հայտնվեն, եթե ռուսական կողմը պարզապես չի ցանկանում թույլատրել մուտք Ռուսաստան։ Անգամ եթե մենք ունենայինք սեփական փոխադրող, միևնույնն է այդ տեղափոխությունը առանց Ռուսաստանի թույլտվության չէր լինի։ Անգամ եթե փորձեինք մուտք ապահովել Բելառուսի կողմից` տեսնելով հայկական անձնագիրը հնարավոր է, որ հայ քաղաքացուն չթույլատրեին մուտք գործել Ռուսաստան։ Այստեղ Հայաստանը շատ քիչ շանսեր ուներ և ձեռքից բաց թողեց այն պատճառով, որ հասկացավ շանսեր չկա Ռուսաստանը չի թողնում և վերջ։
— Ի՞նչ կասեք ՀՀ վարչապետ Նիկոլ Փաշինյանի այն հայտարարության մասին, որ սեպտեմբերից արդեն 1-2 տասնյակ ավիաընկերություններ կանոնավոր չվերթեր են իրականացնելու։
— Ես կասեմ, որ ավիացիոն ոլորտի մասով պարոն Փաշինյանին շատ վատ են իրազեկում։ Բոլոր երկրները պաշտպանում են իրենց օդային սահմանները և չեն ցանկանում, որ իրենց երկիր վարակակիրների հոսք լինի։ Օրինակ դիտարկենք ռուսական «Աէրոֆլոտ»-ը, որը օգոստոսի կեսին ցանկանում էր չվերթ իրականացնել դեպի Երևան, սակայն երբ մոտեցավ այդ ժամանակը, չվերթը հետաձգվեց մինչև օգոստոսի վերջ, սակայն մինչև հիմա այդ չվերթը հետաձգվում է։ Սա նշանակում է, որ պետությունը հետևում է, որ իր երկրում վարակակիրների կտրուկ աճ չգրանցվի։ Այստեղ կա նաև մեկ այլ խնդիր Հայաստանը վարակակիրների թվով բավականին առաջատար դիրքերում է և հաշվի առնելով այդ թվերը ոչ մի երկրից բնականաբար չեն ցանկանա վերադառնալ Հայաստան։ Նույն սկզբունքով պատկերացրեք այն ժամանակ երբ Իտալիան ակտիվ էր վարակակիրների թվով մենք հայերս չվերթ իրականացնեինք դեպի Իտալիա։ Այնպես որ այս հարցով մեղադրել որևէ երկրի ճիշտ չի։ Հայաստանը պետք է հաշվի առնի այն, որ եթե օդանավը որևէ երկրից գալիս է Հայաստան պետք է նաև ուղևորներով հետ վերադառնա, իսկ Հայաստանում այսօր համավարակը բավականին մեծ զարգացում ունի և չեմ կարծում, որ Հայաստանից որևէ բնակչի մուտք այլ երկրում ցանկալի է։ Չվերթների մասով կարծում եմ, որ պետք է լինեն չարտերային չվերթներ իսկ կանոնավոր չվերթների մասին մտածելը կարծում եմ դեռ վաղ է։
Սոնա Գիշյան
