«Լիդիան Ինթերնեյշնլ»-ի բոլոր բաժնետոմսերն անցել են պարտապաններին, այդ թվում «Ամերիա բանկ»-ին և 41 թուրք ներդրողներին
ՀԱՍԱՐԱԿՈՒԹՅՈՒՆ
«Հայաստանի անտառներ» ՀԿ-ի տնօրեն Նազելի Վարդանյանի դիտարկմամբ Ամուլսարի պահապանների պայքարը օգնում է կառավարությանը ոչ միայն պետական բյուջեն պաշտպանել որևէ ոտնձգությունից, այլև մեր երկիրը: Մյուս կողմից «Լիդիան Ինթերնեյշնլ» կազմակերպությունը, որը «Լիդիան Արմենիայի» 100 % բաժնետերն էր, ներկայում գտնվում է սնանկացման պրոցեսում, իսկ այս տարվա մայիսի 5-ին Կանադայի Օնտարիո նահանգի դատարանը դադարեցրել է ընկերության պաշտպանությունը պարտապաններից և «Լիդիան Ինթերնեյշնլ» կազմակերպության բոլոր բաժնետոմսերն անցել են պատապան կազմակերպություններին, որոնք բանկեր են և վարկային կազմակերպություններ:
«Այդ բանկերի և վարկային կազմակերպությունների ցուցակում նշված են երեք միջազգային վարկային կազմակերպություն, «Ամերիա բանկը» և 41 թուրք ներդրողներ: Այսինքն, այս պահին «Լիդիան Ինթերնեյշնլ» կազմակերպությունը որպես այդպիսին արդեն գոյություն չունի, քանի որ սննկացման պրոցեսի մեջ է և որևէ բաժնետոմս չունի: Մինչ այդ, 2019-ի դեկտեմբերից կազմակերպությունը դուրս էր մնացել և Տորոնտոյի բորսայի ցուցակից և չէր կարող վաճառել իր բաժնետոմսերը: Սա է իրական իրավիճակը, բայց Լիդիանը դեռևս փորձում է իր վերջին ճիգերը գործադրել և գոնե մի փոքր հաջողության հասնելու համար Հայաստանից գումար կորզել և ապա մեր երկիրը լքել: Սա է վերջին օրերի սադրանքների հիմքում դրված, բայց ինձ համար հասկանալի չէ, թե երբ է կառավարության կողմից կանխվելու այս ամենը և երբ է վերջնական լուծում տրվելու այս հարցին»,- ասաց Ն. Վարդանյանը:
Խոսելով Շրջակա միջավայրի նորանշանակ նախարար Ռոմանոս Պետրոսյանի հետ` Ամուլսարի հարցը քննարկելու մասին, կազմակերպության ղեկավարը նշեց, որ բնապահպանները ցանկություն են հայտնել հանդիպել նախարարի հետ, սակայն, դեռևս որևէ հանդիպում տեղի չի ունեցել: Նշենք նաև, որ Ն. Վարդանյանը Վարչական դատարանում տարբեր գործերով ներկայացնում է գնդևազցիների շահերը Շրջակա միջավայրի և Տարածքային կառավարման նախարարություններին պարտավորեցնելու առոչինչ ճանաչել նախկին ՇՄԱԳ-ը և նոր փորձաքննություն նշանակելու մասին:
«Ես հանդիսանում են գնդևազցիների շահերի ներկայացուցիչ և, կարծում եմ, որ Շրջակա միջավայրի նորանշանակ նախարարը պետք է հետաքրքրված լինի հանդիպել ինձ հետ և տեղեկանալ, թե իր ղեկավարած նախարարության դեմ ընթացող դատական գործերն ինչ ընթացք ունեն»,- ասաց Ն. Վարդանյանը:
Արմինե Գրիգորյան
