Կալանավորվածների պաշտպանները պնդում են, որ քննությունը բոլորովին սխալ հունով է ընթանում
ՀԱՍԱՐԱԿՈՒԹՅՈՒՆ
Վերջին տվյալներով օգոստոսի 31-ից սեպտեմբերի 10-ն ընկած ժամանակահատվածում Հայաստանում արձանագրվել է ալկոհոլային թունավորման 46 դեպք, որից 19-ը մահվան ելքով: Հիվանդությունների վերահսկման և կանխարգելման ազգային կենտրոնի ոչ վարակիչ հիվանդությունների բաժնի պետ Ռոմելլա Աբովյանը 1or.am-ին տեղեկացրեց, որ թունավորումների այս ծավալն աննախադեպ է, քանի որ անցած 5 տարիների քիմիական թունավորումների համաճարակաբանական մոնիտորինգի արդյունքները ցույց են տալիս, որ այդ ընթացքում նման ծավալի թունավորման դեպքեր չեն եղել: Հարուցված քրեական գործով երեք անձ ձերբակալվել է: Քննություն է տարվում սպիրտի վաճառքի մասնակիցների ողջ շղթան բացահայտելու համար, և այս պահին հանրությանը տեղեկացվել է, որ Աշոտ Հովսեփյանը սպիրտը գնել է Արշակ Արշակյանից, վերջինն էլ այն գնել է Ավետիք Վարդանյանից: Այլ մանրամասներ մինչ այս պահը չեն հրապարկվել:
Վարդանյանի փաստաբան Վարդգես Գևորգյանը 1or.am-ի հետ զրույցում նշեց, որ իր պաշտպանյալն էլ իր հերթին է քննիչին հայտնել, թե ումից է ձեռք բերել սպիրտը:
«Այնպես որ նախաքննական մարմինը տեղյակ է, թե Ա. Վարդանյանը ումից է ձեռք բերել սպիրտը: Նրան ասել են, որ սպիրտը պիտանի է խմելու համար: Բայց քննության հիմնական նպատակն է պարզել, թե ով է հիմնական աղբյուրը»,- ասաց Վ. Գևորգյանը:
Աշոտ Հովսեփյանի պաշտպան Գոռ Գևորգյանը 1or.am-ի հետ զրույցում նշեց, որ իրականում նախաքննական մարմինը բոլորովին այլ ուղով է քննությունն իրականացնում: Եվ փոխանակ պարզի, թե ինչքան մեթիլ սպիրտ է ներկրվել Հայաստան և ում կողմից, ժողովրդի աչքին թոզ փչելու համար, բոլորովին այլ ուղղությամբ է գործի քննությունն իրականացնում:
«Այս պահին խոսք է գնում մեկ տոննա ծավալի մասին, բայց սպիրտի այդ տեսակը Հայաստանում չի արտադրվում: Ուստի, ենթադրաբար այն ներմուծվել է այլ պետությունից: Ներմուծելու ժամանակ 1 կամ 3 տոննա չեն բերում, քանի որ ցիստերնի քանակությունը 22 տոննա և ավելի է: Եվ, փոխարենը պարզեն, թե ուր է մնացած սպիրտը, ինչպես է ներթափանցել Հայաստան, մեթիլ սպիրտ ներմուծելու ժամանակ արդյոք հայտարարգրել են, որ այն թունավոր նյութ պարունակող սպիրտ է ներմուծում, թե այն ներմուծել են որպես էթիլ սպիրտ: ՊԵԿ-ը պետք է այս և մի շարք այլ հարցերի պատասխանի, բայց, չգիտես ինչու լռում է: Պետք է իրական մեղավորներին գտնել:
Բազմաթիվ են նաև հարցերը, որոնց պատասխանները պետք է տա նախաքննական մարմինը, ոչ թե մի քանի հոգու կալանավորի և նրանց վրա մեղքը բարդի: Որպես նախկին քննիչ՝ ես իմ մտահոգությունն եմ հայտնում, որ քննության իրական ուղին այն չպետք է լիներ, որով այսօր ընթանում է: Պաշտպանյալս հայտնել է բոլոր այն անձանց շրջանակը, ում վաճառել է, տվել է նաև իր մոտ գտնվող սպիրտի ամբողջ քանակությունը: Էլ ի՞նչ պետք է աներ, որ ցույց տար, որ նախաքննությանը չի խոչընդոտում և պարկեշտ վարքագիծ է դրսևորում»,- ասաց Գ. Գևորգյանը:
Արմինե Գրիգորյան
