Արդեն պետք է վերադառնալ բնականոն կյանքին․ վարակաբան
ՀԱՍԱՐԱԿՈՒԹՅՈՒՆ
1or.am կայքի զրուցակիցը վարակաբան Մարինե Խաչատրյանն է։
- Տիկին Խաչատրյան, կառավարությունը ԱԺ ներկայացրած նախագծով փոխել է արտակարգ դրությունը կարանտինով։ Ըստ ձեզ՝ սա ի՞նչ կփոխի մեր կյանքում, արդյոք սա վարակի զարգացմանը չի նպաստի։
—Շատ հնարավոր է, որ նպաստի, բայց ինձ թվում է, որ արտակարգ ռեժիմը կամ կարանտինը երկարացնելը շատ սխալ կլինի։
- Շատ երկրներում հիմա կարծես վարակի տարածման երկրորդ փուլն է սկսվել, և օրական դեպքերի թիվը դարձյալ աճում է։ Հայաստանում էլ վերսկսվում են բուհերի, դպրոցների աշխատանքը։ Ի"նչ եք կարծում ՝ մե՞նք էլ երկրորդ փուլին սպասենք, թե՞ դա կարող ենք շրջանցել։
— Շատ հնարավոր է, որ երկրորդ փուլ լինի, որովհետև ցանկացած վիրուսային հիվանդություն միշտ էլ ունենում է երկրորդ էտապը։ Չնայած նրան, որ որպես բժիշկ պետք է ասեմ, որ պետք է շարունակել համավարակի խիստ ռեժիմը, բայց իմ կարծիքով պետք է հանել խիստ ռեժիմը և անցնել սովորական կյանքի։ Քանի որ սա վիրուսային հիվանդություն է և վաղ թե ուշ բոլորը վարակվելու են, և բոլորը պետք է դրա միջով անցնեն և ձեռք բերեն իմունիտետ, որ հիվանդությունը ավելի թեթև տանեն։ Իմ կարծիքով ինչքան շուտ հանվի այդքան հեշտ կլինի։
- Ի"նչ եք կարծում այսօրվա շուրջ 45 հազար վարակակիրների թիվը բավարա՞ր է, որ խոսենք բնակչության իմունային շերտի ձևավորման մասին։
— 45 հազար վարակակիր պաշտոնական տվյալներով, բայց ես կարծում եմ, որ կես միլիոնից ավել մարդ արդեն վարակվել է, իսկ դա նշանակում է, որ իմունային շերտը արդեն բավականին ձևավորված է։
Սոնա Գիշյան
