Եթե ինձ ազատում են, ապա պետք է բոլոր ՊՈԱԿ-ների ղեկավարներին ևս աշխատանքից ազատեն. Ամատունի Վիրաբյան
ՀԱՍԱՐԱԿՈՒԹՅՈՒՆ
Հայաստանի ազգային արխիվի տնօրեն Ամատունի Վիրաբյանի շուրջ առաջին անգամ չէ, որ սև ամպեր են կուտակվում: Իշխանափոխությունից հետո նրան ստիպել էին աշխատանքից ազատման դիմում գրել, բայց նա հրաժարվել էր։ Օրերս ՀՀ արդարադատության նախարարի հրամանով են Ա.Վիրաբյանին աշխատանքից ազատել՝ հարկեր չվճարելու պատճառաբանությամբ, որը, պարզվում է բավականին վիճելի և զավեշտալի պատճառ է։
1or.am-ի հետ զրույցում Ամատունի Վիրաբյանը նշեց, որ աշխատանքից ազատելու նախարարի որոշումը անհիմն է, քանի որ այն ինչի մեջ իրեն մեղադրում են, համակարգային խնդիր է եղել, որը տարիներ շարունակ լուծում չէր ստանում:
«Ինձ մեղադրում են հաշվապահական հաշվառումը սխալ վարելու համար, բայց ես կառույցի տնօրենն եմ: Իսկ ինչ վերաբերում է հաշվապահությունը սխալ վարելուն, ապա դա նրա արդյունք է, որ տարիներ շարունակ մեզ բյուջեից գումարներ չի հատկացվել, որպեսզի մենք կարողանանք ավելացված արժեքի հարկ վճարենք: Ամեն տարի ստուգում է իրականացվել, այդ մասով ակտ է կազմվել, և պետությունը այդ գումարը պահուստային ֆոնդից հատկացրել է, մենք էլ վճարել ենք: Եվ ամեն ինչ հարթվել է: Այդպես են աշխատել բոլոր ՊՈԱԿ-ները, այդ թվում՝ Մատենադարանը: Եվ եթե դրա համար ինձ աշխատանքից ազատում են, ապա այդ հիմքով պետք է մնացած բոլոր ՊՈԱԿ-ների տնօրեններին ևս աշխատանքից ազատեն, քանի որ նախկինում այդ խնդրի առաջ կանգնած են եղել բոլորը»,- ասաց Ա. Վիրաբյանը:
Տնօրենը նշեց, որ խոսքը 800 մլն դրամի մասին է, որը երեք տարվա պարտքի ընդհանուր չափն է կազմում: Հետաքրքիր մեկ փաստ ևս: մինչև 2016 թվականը օրենքով նախատեսված չի եղել, որ ՊՈԱԿ-ները ավելացված արժեքի հարկ վճարեն, բայց երբ հետագայում օրենքը փոխվել է, բյուջեով ՊՈԱԿ-ներին հատկացվող գումարների չափը մնացել է նույնը, որը նման երևույթի պատճառ է հանդիսացել:
«2019 թվականի հունվարի 1-ից բյուջեով այդ գումարը նախատեսվել է և, պարզ է` դրանից հետո որևէ խնդիր այդ ուղղությամբ չի առաջացել, իսկ նախորդ երեք տարիներին՝ 16,17,18 թվականներին այդ խնդիրը եղել է»,- ասաց Ա. Վիրաբյանը:
Արմինե Գրիգորյան
