Եթե վարորդներից բացի, նաև ֆիրմաները լիցենզավորվեն, ապա շատ հարցեր կկարգավորվեն. Ջուլիետտա Ղազարյան
ՀԱՍԱՐԱԿՈՒԹՅՈՒՆ
«Ավտոմոբիլային տրանսպորտի մասին» օրենքում նախատեսվում է փոփոխություն կատարել, համաձայն որի պետք է սահմանվեն որոշակի դրույթներ՝ C, D, CE, DE C1E, D1E կատեգորիայով աշխատող թե՛ ներպետական, թե՛ միջպետական բեռնափոխադրումներ և ուղևորափոխադրումներ իրականացնող վարորդների համար: ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանն այս առիթով օրերս հայտարարել է, որ միջպետական ուղևորա և բեռնափոխադրումներ իրականացնող կազմակերպությունները պետք է համապատախանեն որոշակի միջազգային պահանջների: Կազմակերպությունները պետք է ունենան նաև ֆինանսական կայունություն, բարի համբավ, ինչն ըստ եվրոպական պահանջների, նշանակում է, որ վարորդները չպետք է ունենան շատ տուգանքներ, մեքենայություններում պետք է ներգրավված չլինեն:
Օրենքի նախագծով նախատեսվում է, որ վարորդները պետք է անցնեն նախնական մասնագիտական որակավորման դասընթացներ, որոնք ավարտվելու են թեստավորմամբ: Այն հաջողությամբ անցնելու դեպքում կստանան միջազգային որակավորման վկայականներ, իսկ 5 տարին մեկ անգամ վարորդները կանցնեն նաև վերապատրաստում, ինչը կնշվի միջազգային որակավորման վկայականում: «Պեգաս Տրանս» միջազգային բեռնափոխադրումներ իրականացնող ընկերության տնօրեն Ջուլիետտա Ղազարյանը 1or.am-ի հետ զրույցում նշեց, որ տրանսպորտի ոլորտում լիցենզվորումը խիստ անհրաժեշտ է, քանի որ լոգիստիկ շղթայում գործունեություն իրականացնող վարորդները, շատ դեպքերում չտիրապետելով ոլորտի ռիսկերին, խնդիրներ են առաջացնում շուկայում գործող ընկերությունների համար:
Նաև կան շատ վարորդներ, որոնք չեն տիրապետում ոլորտին և չեն կարողանում աշխատանքը ճիշտ ձևով կազմակերպել, որի արդյունքում կա՛մ բեռն է վնասվում, կա՛մ փաստաթղթերն են անփույթ ձևով լրացնում, ինչը ևս խնդիր է առաջացնում պատվիրատուի և բեռնափոխադրում իրականացնող ընկերության համար:
«Վարորդների 90%-ը չի էլ պատկերացնում, թե ինչպես պետք է սահմանը հատելու իրավունք ստանալու ժամանակ փաստաթղթերը լրացնի, որը իր գործառույթն է: Եվ, լինում են դեպքեր, որ վարորդի անբարեխիղճ աշխատանքի պատճառով տուժում է բեռնափոխադրում իրականացնող ընկերությունը: Դա շատ արդիական խնդիր է: Բացի այդ, ես կցանկանայի, որ լիցենզավորվեին նաև բեռնափոխադրում իրականացնող ընկերությունները, քանի որ շատ բեռնափոխադրում իրականացնող միջնորդ ընկերություններ կան, որոնք խաբեությամբ են զբաղվում»,- ասաց Ջ. Ղազարյանը:
Ղազարյանի խոսքով՝ խաբեության զոհ են դառնում լոգիստիկ շղթայում գործող ոչ միայն միջնորդ կազմակերպությունները, այլև վարորդները: Ուստի, նման օրենք ընդունելու դեպքում շատ հարցեր կկարգավորվեն: Նրա կարծիքով, վարորդները ևս գոհ կմնան նման օրենք ընդունելու դեպքում, քանի որ բավական բարդ աշխատանք իրականացնելով այլևս չեն տուժի:
«Արդար աշխատող ոչ մի մարդ չի ցանկանա, որ իրեն խաբեն: Ուստի, եթե լիցենզավորեն ոչ միայն վարորդները, այլև ֆիրմաները, ապա շատ հարցեր կկարգավորվեն: Հարկավոր է նաև որոշակի մարտավարություն մշակել, որի շնորհիվ դաշտից կմաղվեն նաև սնկի պես աճող այն միջնորդ ընկերությունները, որոնք խաբեությամբ են զբաղվում»,- ասաց Ջ. Ղազարյանը:
Արմինե Գրիգորյան
