ԵՊՀ ռեկտորի ժամանակավոր պաշտոնակատարի ասուլիսին օնլայն հարթակից հարց ուղղել հնարավոր չեղավ
ՀԱՍԱՐԱԿՈՒԹՅՈՒՆ
Այսօր ԵՊՀ ռեկտորի ժամանակավոր պաշտոնակատար, ակադեմիկոս Գեղամ Գևորգյանը մամուլի ասուլիս էր հրավիրել, որի ժամանակ ներկայացնելով բուհում իրականացված գործընթացները, անդրադարձավ նաև այս տարի կրթական ծրագրերում կատարված փոփոխություններին, այդ թվում՝ մագիստրատուրայի ընթացքում պրակտիկայի ներառմանը, որը նախորդ տարիներին չի եղել: Անդրադառնալով ռեկտորների ընտրության կամ նշանակվելու մասին հարցին` Գ. Գևորգյանը նշեց, որ իր կարծիքով ճիշտը նշանակելն է, քանի որ նախկինում իրականացված բոլոր ընտրությունների ժամանակ, իրականում, բուհերի ռեկտորները նշանակվել են:
«Ես միշտ ասել եմ, որ ճիշտ եմ համարում ռեկտորի նշանակումը: Գաղտնիք չէ, որ բոլոր բուհերի ռեկտորները պետք է ունենան իշխանությունների աջակցությունը և դա նորմալ է: Եվ ես համարում եմ, որ իշխանությունն էլ պետք է նշանակի ռեկտորներին, քանի որ ինչպես այս, այնպես էլ շատ այլ բուհերի սեփականատերը պետությունն է: Եվ էնպես չի լինում, որ որևէ կազմակերպության գործերը տնօրինի ոչ սեփականատերը: Դա անբնական է»,- ասաց Գ. Գևորգյանը:
Ի դեպ, 1or.am-ը ևս հարց ուներ ԵՊՀ ռեկտորի ժամանակավոր պաշտոնակատարին, սակայն ասուլիսին անձամբ ներկա չլինելու պատճառով մեր հարցը չհնչեցվեց: Հարցը մենք կուղղենք գրավոր հարցում ուղարկելով, բայց հարց է ծագում, թե ինչու ԵՊՀ ռեկտորի ասուլիսին հնարավորություն չունեցան հարց ուղղել այն լրատվամիջոցները, որոնք անձամբ ներկա չէին գտնվել, առավել ևս, երբ վաղուց արդեն նորմալ պրակտիկա է դարձել օնլայն հարթակներով բանախոսներին հարց ուղղելու պրակտիկան: Սա ևս մեկ ապացույց է, որ ԵՊՀ-ում դեռևս շարունակվում է զգուշավորություն ցուցաբերելու քաղաքականությանը, ինչը, հատկապես իշխանափոխությունից հետո, համաձայնեք, ընկալելի չէ ո՛չ հասարակության, ո՛չ էլ իշխանափոխության գաղափարախոսության տեսանկյունից:
Արմինե Գրիգորյան
