«Հրապարակ». Կառավարությունն ԱԺ է ուղարկել նախագիծը, որով առաջարկում է արտակարգ դրության ռեժիմում Առողջապահության նախարարության կառավարմանը հանձնել ՀՀ-ում գործող բոլոր բուժհիմնարկները
ՄԱՄՈՒԼԻ ՏԵՍՈՒԹՅՈՒՆ
«Չնայած լուրերին, թե արտակարգ դրության ռեժիմը սեպտեմբերի 11-ից այլևս չի երկարաձգվելու, կառավարությունն ԱԺ է ուղարկել «Արտակարգ դրության իրավական ռեժիմի մասին» օրենքում լրացումներ կատարելու նախագիծը, որով առաջարկում է արտակարգ դրության ռեժիմում Առողջապահության նախարարության կառավարմանը հանձնել Հայաստանում գործող բոլոր բուժհիմնարկները՝ անկախ սեփականության ձևից։
Հիշեցնենք, որ այս օրինագծի դեմ տևական ժամանակ մայրաքաղաքի մասնավոր ԲԿ-ներն էին ընդվզում, սեփականատերերի համար հասկանալի չէր, թե ինչպես պետք է իրականացվի այդ գործընթացը, որ իրենց բիզնեսը չտուժի։
Նախագծից տեղեկանում ենք, որ այն մշակվել է Առողջապահության նախարարության իրավաբանական վարչության կողմից, և չկա հիշատակում, որ քննարկվել է կողմերի հետ։ Այն պարագայում, երբ նախատեսվում է մի շարք լիազորություններ (կադրային ռեսուրսներ, բժշկական գույք, մահճակալային ֆոնդ, բժշկական նշանակության ապրանքներ, տեխնիկական և հարակից միջոցներ, շարժական գույք և բժշկական օգնություն, սպասարկում իրականացնող կազմակերպությունների բնականոն աշխատանքն ապահովող օժանդակ միջոցներ և այլն) վերապահել առողջապահության պետական կառավարման լիազոր մարմնին՝ նախարարությանը։
Նախագիծն ընդգրկված է պետաիրավական հանձնաժողովի սեպտեմբերի 3-ի նիստի օրակարգում։ Ի դեպ, փաստը, որ ոչ թե գլխադասային՝ առողջապահության հանձնաժողովում է քննարկվելու, այլ պետաիրավականում, ևս վկայում է, որ իշխանության ներսում էլ կարծիքները միանշանակ չեն»,-գրում է թերթը։
Նյութն ամբողջությամբ կարդացեք թերթի այսօրվա համարում:
