Կրիտիկական օրեր առանց ներդիրի
ՎԵՐԼՈՒԾՈՒԹՅՈՒՆՆԵՐ
Պարետի վերջին որոշումը՝ դիմակ կրողների սորտավորման վերաբերյալ, մահկանացուների մոտ հիմնավոր կասկածներ է սկսում առաջացնել Նիկոլ Փաշինյանի երկրային ծագման վերաբերյալ: Նախ նա միակ մարդն է Երկիր մոլորակի վրա, որը կարողացավ կորոնավիրուսից բուժվել ընդամենը մեկ շաբաթում: Իսկ հիմա էլ պարզվում է, որ նա և ևս մի քանի ընտրյալ մսից և արյունից չեն և կարող են դիմակ չկրել: Դե իսկ այդ ընթացքում կորոնավիրուսային պատերազմի Սուվորովը գնաց Ալպեր և այնտեղից սելֆիներ է տարածում: Ի դեպ, արձակուրդ գնաց նաև ինքը գեներալիսիմուսը: Այդպիսով, Արայիկ Հարությունյանին մեն-մենակ թողնելով, դեպրեսիայից և սոցիալական ճգնաժամից վրդովված հասարակության այն հատվածի հետ, որը պատրաստվում է իր երեխաներին ուղարկել դպրոց պանդեմիայի պայմաններում:
Տնտեսական զարգացման վիճակագրական թվերը, որոնք այս իշխանությունը ներկայացվում է հին ու բարի ավանդույթների համաձայն՝ միայն բարի լուրեր սկզբունքով, չեն տալիս իրենց արդյունքները, որովհետև հպարտ քաղաքացին վաղուց արդեն հավատում է միայն իր և իր ընտանիքի սոցիալական վիճակին, այլ ոչ թե լայվերով ներկայացվող գեղեցիկ թվերին: Իսկ Նիկոլ Փաշինյանը երկու տարի հետո էլ չհասկացավ, որ տնտեսության հիմքը միայն ՀԴՄ-ն չէ: Հիմա էլ, ըստ օդում կախված լուրերի, պարոն Փաշինյանը հրահանգել է ամբողջ ուժերն ու կարողությունները (այդ թվում պետության կողմից տրամադրվող ֆինանսական աջակցությունները) կենտրոնացնել գյուղատնտեսության վրա: Այն գյուղատնտեսության, որի նախարարության կարիքը վարչապետը չունի արդեն մեկուկես տարի: Դրա համար էլ գյուղատնտեսության թեմաներով մարզային շրջայցերի ժամանակ նրան ուղեկցում է Սուրեն Պապիկյանը՝ Հայաստանի Հանրապետության տարածքային կառավարման և ենթակառուցվածքների նախարարը:
Վարչապետն այնքան է ոգևորվել ասֆալտապատման տեմպերով, որ պարոն Պապիկյանին տանում է իր հետ, երևի որ վարելահողերն ու այգիներն էլ ասֆալտապատել տա: Ու այս ամենը քիչ էր, այսօր էլ Վլադիմիր Վլադիմիրովիչը շնորհավորել է Ռոբերտ Քոչարյանի ծննդյան օրը: Մի խոսքով իշխանության կրիտիկական օրերը սկսվել են: Բայց դա այդքան էլ պրոբլեմ չէր լինի, եթե գոնե ներդիր ունենային:
Գայանե Հովհաննիսյան
