ՀՀ խճճված տնտեսական իրականությունը
ՎԵՐԼՈՒԾՈՒԹՅՈՒՆՆԵՐ
Թերևս նորություն ասած չենք լինի, եթե փաստենք, որ այսօր ՀՀ տնտեսությունը փաստացի գահավիժում է, ավելին՝ տնտեսական անկման տեմպերն ամսեամիս խորանում են։ Ամենապարզ հաշվարկով պարզից էլ պարզ է, որ տնտեսության բոլոր ճյուղերում շրջանառությունները նվազում են, նվազում են մարդկանց եկամուտները, միաժամանակ հազարներով կրճատվում են աշխատատեղերը։ Այս ամենի հետ մեկտեղ, թվում է, թե նման վիճակում գտնվող երկրի ղեկավարը պետք է օրուգիշեր զբաղված լինի տնտեսության խթանման ծրագրերով, մասնավորապես՝ մեծածավալ կապիտալ ծախսեր իրականացնելով, բիզնեսի կյանքը հեշտացնելով, երկու տարի շարունակ ցամաքող օտարերկրյա ներդրումները երկիր բերելու փորձեր անելով և այլն։
Իսկ ի՞նչ է անում այսօր Նիկոլ Փաշինյանը․ առանձնապես ոչինչ, ավելի կոնկրետ՝ նույնը, ինչ մշտապես՝ բեմադրություններ, խոսում է կոռուպցիայի մասին, ուրիշներին մեղադրում դրա մեջ, իսկ իրեն սրբացնում, տնտեսության վիճակն էլ դարձյալ պայմանավորում ՀԴՄ կտրոններ խփել-չխփելով։ Ապացուցման կարիք չունի այն, որ Փաշինյանը անտեղյակ է տնտեսությունից, գաղտնիք չէ, դրանում համոզվելու փաստերի պակաս չի եղել անցած երկուսուկես տարիների ընթացքում․ կայացած փաստ է այն, որ այս ընթացքում տնտեսության մասին նրա իմացության մակարդակը նույնն է մնացել։
Համաձայնեք՝ մեղմ ասած այդ հանգամանքն այնքան էլ նախաձելի կարգավիճակ չէ ցանկացած ճգնաժամային վիճակում հայտնված, սահմանափակ ռեսուրսներ ունեցող և աշխարհաքաղաքական բարդագույն կացություն ունեցող պետության համար։ Իսկ հիմա երկու խոսք, թե իրականում ինչ է իրենից ներկայացնում Փաշինյանի այդքան սիրելի ՀԴՄ-ն։ Ըստ էության՝ դա գործիք է ստվերի դեմ պայքարելու և տնտեսության իրական շրջանառությունը բացահայտելու համար, աակայն, միաժամանակ, այն նաև գործիք է տնտեսվարողներին, մասնավորապես՝ փոքր բիզնեսին ահաբեկելու և ի վերջո սնանկացնելու:
Երբ անզեն աչքով էլ տեսանելի է, թե որքան բիզնեսներ են փակվում և ամեն օր ավելանում «տրվում է վարձով» հայտարարությունները, ՀԴՄ կտրոն պահանջելը և այն չտրամադրելու դեպքում տուգանելը, նշանակում է պարզապես փակել տվյալ բիզնեսը։ Այդ դեպքում, պետբյուջեն չի ստանա փակված հերթական փոքր բիզնեսի կողմից ներկայումս վճարվող քիչ կամ շատ հարկային եկամուտը:Այս շարքը կարելի է անվերջ շարունակել։ Եվ այսքանից հետո ծիծաղելի վիճակում կհայտնվի նա, ով կասի, թե կառավարությունը, իշխանական պատգամավորներն ու մյուս պատշոնյաները և հենց Նիկոլ Փաշինյանը աշխատում են հանուն պետության և ժողովրդի բարօրության համար։
Անդրանիկ Կիրակոսյան
