Շիրակի պետհամալսարանից 1 տարի 10 ամսվա ընթացքում բյուջեից ուղղակի վատնվել է 700-750 մլն դրամ գումար
ՔԱՂԱՔԱԿԱՆՈՒԹՅՈՒՆ
1or.am-ի հարցերին պատասխանում է քաղաքագետ Գագիկ Համբարյանը:
- Պարոն Համբարյան ՀՀ երկրորդ նախագահ Ռոբերտ Քոչարյանի երեկվա հարցազրույցից կարող ե՞ք առանձնացնել առանձին դրույթներ և մեկնաբանել:
- Չէի ասի, որ առանձին դրույթներ կարող եմ առանձնացնել, որովհետև հարցազրույցը ըստ էության շատ հետաքրքիր էր, վերաբերում էր կոնկրետ տնտեսական իրավիճակին ամբողջ հանրապետությունում, և այստեղ խնդիրը հետևյալն է այն դասական հարցազրույց չէր այլ հանդիպում էր տնտեսագետների հետ։ Ինձ համար հանդիպումը հետաքրքիր էր այն առումով, որ շատ դեպքերում գործող իշխանությունների ներկայացրած վարդագույն պատկերը պարզվում է վարդագույն չէ, ավելին ասեմ, ավելի մոխրագույն է և ավելի մթագնած, քան իրականում կա։
- Ռոբերտ Քոչարյանը անդրադարձավ նաև ներկայիս իշխանությունների կոռուպցիայի դեմ պայքարի արդյունքում 105 մլն դոլլար հետ վերադարձնելու հայտարարությանը: Ձեր կարծիքը այդ թեմայով:
- Ընդհանուր առմամբ դա շատ բաց տեղեկատվություն է, այն որ 105 մլն դոլլար են հետ վերադարձրել բայց միևնույն ժամանակ նաև 2018 թվականի մայիսից մինչև 2020 թվականի մայիս, այսինքն 2 տարվա մեջ 110 մլն դոլլարի էլ պարգևավճար են տվել իրենց ներկայացուցիչներին։ Ես Հայաստանում կոռուպցիայի դեմ խոշոր պայքար չեմ տեսնում, տենսում եմ ընդհամենը քաղաքական պատվերներով մարդկանց հետապնդելու գործընթաց։ Ես չեմ տեսնում կոռուպցիայի դեմ պայքարի համար համապատասխան քաղաքականություն, որովհետև ես որքան տեսնում եմ կոռուպցիայի դեմ մեղադրվում են այն մարդիկ, ովքեր համաձայն չեն գործող իշխանությունների հետ և չեն պաչել Նիկոլ Փաշինյանի աջը։ Իսկ այն բոլոր գործիչները, նույն օլիգարխիայի ներկայացուցիչները, որոնց Նիկոլ Փաշինյանը մեղադրում էր կոռուպցիոն սխեմաներով գումարներ կուտակելու և նույնիսկ մարդասպանությունների մեջ, այսօր այս իշխանությունների կողմից շատ հարգված և ընդունված մարդիկ են։ Հիմա դատախազությունն էլ է սիրում կոռուպցիայի անվան տակ հայտարարություններ անել օրինակ մի քանի օր առաջ Գյումրի բժշկական կենտրոնի վերաբերյալ հայտարարություն արեցին, որ բժիշկները 1 մլն 800 հազար դրամ գումար են շորթել հիվանդներից, մարդկանց խայտառակելու համար մեր դատախազությունը իր տեղում է։ Բայց երբ հարցը վերաբերում է իշխանությունների կողմից շատ սիրելի նախկին ՀՀԿ-ական Սահակ Մինասյանին, ով զբաղեցրել է Շիրակի պետհամալսարանի ռեկտորի պաշտոնը և ում կառավարման օրոք Շիրակի պետհամալսարանը ուղղակի ֆինանսական կոլապսի ենթարկվեց դրա մասին ոչ մի ծպտուն չկա։ Տարբեր տվյալներով Շիրակի պետհամալսարանից 1 տարի 10 ամսվա ընթացքում բյուջեից ուղղակի վատնվել է 700-750 մլն դրամ գումար։ Այս մեթոդներով էլ ներկայիս իշխանությունը փորձում է կոռուպցիայի դեմ այդ իմիտացիան ստեղծել և հասարակությանը համոզել, որ կոռուպցիայի դեմ պայքար է մղում, որի արդյունքը այդ ծիծաղելի 105 մլն դոլլար գումարն է։ Ինչո՞ւ ծիծաղելի, որովհետև չի կարող գործող իշխանությունների կողմից նախկին իշխանություններին կոռուպցիայի և կաշառակերության մեջ բազմաթիվ մեղադրանքների արդյունքում պարզվի, որ ընդհամենը 105 մլն դոլլար էին կոռուպցիոներները տարել պետությունից։
- Կառավարությունը քննարկում է ԱԺ-ի կայուն մեծամասնության գաղափարից հրաժարվելու հարցը: Դուք ինչպե՞ս եք սա գնահատում:
- Պառլամենտական հանրապետությունում, եթե պառլամենտի կողմից ձևավորվող կառավարությունը պարզ մեծամասնություն չունի օրենսդիր մարմնում, դա անտրամաբանական է։ Ես գնահատում եմ սա հետևյալ կերպ, որ Նիկոլ Փաշինյանը ունի վախեր, վախեր, որ իր ղեկավարած քաղաքական ուժը, որը այս պահին կառավարությունում 72 % ձայներ ունի, այսինքն 88 պատգամավոր, շուտով կարող է տրոհվել և Նիկոլ Փաշինյանը ունի վախեր, որ ամեն տարի կառավարության հաշվետվության ժամանակ այդ պատգամավորները կարող են դեմ քվեարկել։ Հիմա ուզում եմ հասկանալ թե Նիկոլ Փաշինյանը ինչ է ուզում առաջարկել, լինելով պառլամենտական երկիր ինքը իր ձևավորած կառավարությունը դուրս բերի օրենսդիր մարմնի վերահսկողությունից և հայտարարի, որ ինքը ամեն ինչից վեր է։ Ի դեպ պետք է նշեմ, որ այսպիսի քաղաքականություն ժամանակին վարել է Ադոլֆ Հիտլերը՝ Գերմանիայում, երբ 1931 թվականին եկավ իշխանության և արդեն 1935 թվականին արտակարգ օրենքներ փոփոխելով դուրս բերեց կառավարությունը օրենսդիր մարմնին հաշվետվություն ներկայացնելու պարտականությունից։ Հիմա ինձ հետաքրքիր է, թե գործող իշխանությունները ինչպես են պատկերացնում պարզ մեծամասնություն, եթե չլինի բա ի՞նչ լինի․․․ Պարոն Փաշինյանն ի՞նչ է առաջարկում։ Ընդհանրապես բոլորն էլ գիտեն, որ օրենսդիր մարմինը իրավասու է նաև համապատասխան ընթացակարգով կառավարությանն անվստահություն հայտնել, եթե դրա անհրաժեշտությունը կա։ Ես, օրինակ, պառլամենտական կառավարման համակարգերի մի քանի ձև գիտեմ, որի մեջ, ամեն դեպքում, մեծամասնությունն է ձևավորում կառավարություն։ Եթե օրենսդիր մարմնում չկա պարզ մեծամասնություն, ապա գործադիր իշխանությունը ինչպե՞ս պետք է ձևավորվի։
Սոնա Գիշյան
