ՀՀ պատմության մեջ նմանը չունեցող գործիքների առկայությունը բավարար չէ արդյունքի հասնելու համար
ՎԵՐԼՈՒԾՈՒԹՅՈՒՆՆԵՐ
Հայաստանն ունի հստակ օրակարգ՝ դատական համակարգում հիմնարար ու խորքային բարեփոխումներ իրականացնելու, պնդում է ՀՀ արդարադատության նախարար Ռուստամ Բադասյանը: Նա ընդգծում է, որ Դատական օրենսգրքում և հարակից օրենքներում իրականացրած բարեփոխումներով հնարավոր կլինի բարեվարքության և գույքային դրության ստուգում իրականացնել, որով կզբաղվի Կոռուպցիայի կանխարգելման հանձնաժողովը: Հանձնաժողովը ստուգելու է նաև գործող դատավորների, Բարձրագույն դատական խորհրդի անդամների և Սահմանադրական դատարանի դատավորների գույքային դրությունը՝ բոլոր տարիների հայտարարագրերի մանրամասն վերլուծության և տվյալների համադրման միջոցով։
«Ապօրինի ծագում ունեցող գույքի բռնագանձման մասին» օրենքով հնարավորություն կընձեռվի Գլխավոր դատախազությանը, համապատասխան հիմքերի առկայության դեպքում ուսումնասիրել գույքի ձեռքբերման օրինականությունը և գույքի բռնագանձման պահանջով հայց ներկայացնել: Նախարարի դիտարկմամբ ՀՀ պատմության մեջ նմանը չունեցող գործիքները արդեն իսկ կիրառության մեջ են և շուտով կարձանագրեն նաև առաջին արդյունքները։ Սա, ինչպես երևում է հասարակությանը խոստացված վեթթինգի բավականին «լայթ» տեսակն է, որը բավակին ուշացած քայլ լինելուց բացի, առանձնապես արդյունավետ չի լինի:
Գաղտնիք չէ, որ շատ նախկին պաշտոնյաներ այս ընթացքում հասցրել են մաքրազարդել իրենց ուեցվածքը, եղածը գրանցել այլ անձանց, մտերիմների, բարեկամների անուններով կամ՝ վաճառել: Ինչ վերաբերում է հայտարարագրերի վերլուծությանն ապավինելուն, ապա այն ևս հիմնականում իրական ունեցվածքի մասին տեղեկություններ չի պարունակել, կրել է զուտ ձևական բնույթ, ուստի, ակնհայտ է, որ շատ նախկին պաշտոնյաներ կկարողանան այս փորձությունն առանց ցնցումների հաղթահարել: Ուստի, ՀՀ պատմության մեջ նմանը չունեցող գործիքների առկայությունը դժվար թե օգնի ապօրինի գույքի բռնագանձումն այնպես իրականացնել, որ հասարակությունը գոհ մնա արդյունքներից:
Արման Առաքելյան
