Օլիգարխներն ապականում են հերթական ոլորտը
ՎԵՐԼՈՒԾՈՒԹՅՈՒՆՆԵՐ
Ինչպես հայտնի է, վերջին տարիներին Հայաստանի տնտեսության այցեքարտերի շարքում, բացի տեղեկատվական տեխնոլոգիաների ոլորտից, իր արժանի տեղն է սկսել զբաղեցնել այլընտրանքային էներգետիկան` իր տարբեր ճյուղերով: Մասնավորապես, բառի բուն իմաստով, բուռն զարգացում է ապրում արևային էներգետիկան: Երկրում բավականին արագ տեմպերով հայտնվում և զարգանում են այդ ոլորտում գործունեություն ծավալող ընկերությունները: Բնականաբար դա նպաստում է նոր աշխատատեղերի ստեղծմանը, պետական բյուջե մուտքերի ավելացմանը և, որ գուցե ամենակարևորն է, յուրաքանչյուր արևային կայան և լոկալ առումով, յուրաքանչյուր տաքացուցիչ ավելացնում է երկրի էներգետիկ անկախության և անվտանգության մակարդակը:
Սակայն, ինչպես և բիզնեսի յուրաքանչյուր ոլորտում, որտեղ սկսում են քիչ թե շատ լուրջ ֆինանսական միջոցներ շրջանառվել, այս ոլորտը նույնպես վերջին շրջանում սկսել է գրավել տեղական օլիգարխիայի ուշադրությունը: Ու եթե Գագիկ Ծառուկյանը ոլորտ մտել է դեռ մի քանի տարի առաջ, կազմակերպելով արևային պանելների արտադրություն, ապա այս իշխանությունների «սրտի գործարար» Սամվել Ալեքսանյանը որոշել է զբաղվել իր սիրած գործով՝ ներմուծմամբ: Եվ ինչպես սովորաբար լինում է օլիգարխների պարագայում, նրանք փորձում են համապատասխան արտոնյալ դաշտեր ձևավորել իրենց գործունեության համար: Մեկը սովորականի պես, տեղական արտադրողի շահերը պաշտպանելու քողի տակ փորձում է օրենսդրական խոչընդոտներ սահմանել ոլորտում մինչ օրս զարգացում ապահովող ընկերությունների համար՝ դրանով իսկ փորձելով արտոնյալ պայմաններ ստեղծել առայժմ իրենց ոչ մրցունակ արտադրանքի համար, մյուսը փաստաթղթային մանիպուլյացիաների եղանակով և այլ քաղաքացիների անունով գրանցված ընկերությունների միջոցով փորձում է դեմպինգի ենթարկել ձևավորված շուկան:
Ի դեպ, ժամանակին, երբ մեծ փողերի հոտ եկավ ՏՏ ոլորտից, որոշ օլիգարխներ՝ մասնավորապես Խաչատուր Սուքիասյանը, փորձեցին մտնել այդ ոլորտ և փոխել խաղի կանոնները: Ոլորտի կազմակերպությունները և դրանց միավորող միությունը համատեղ ջանքերով դիմադրեցին այդ ծրագրերին և կարողացան մինչ օրս էլ ապահովել այդ ոլորտի բնականոն և հետևողական զարգացումը:
Միքայել Ղևոնդյան
