Եղեգնուտցիները վճռական են տրամադրված
ՀԱՍԱՐԱԿՈՒԹՅՈՒՆ
Երեկ, կառավարության շենքի մոտ տեղի ունեցավ «Ոչ նախկին գյուղապետին» կարգախոսով եղեգնուտցիների ակցիան: Նրանք իրենց պահանջը ներկայացնելու համար ավտոերթով եկել էին Երևան, վարչապետ Նիկոլ Փաշինյանին անձամբ տեղեկացնելու, թե իրականում ինչ է կատարվում իրենց համայնքում: Եղեգնուտցիների հետ հանդիպել և նրանց տեսակետը լսել է վարչապետի օգնական Նաիրի Սարգսյանը: Արմավիրի մարզի Եղեգնուտ համայնքի ավագանու անդամ Անտոն Խուրշուդյանը 1or.am-ի հետ զրույցում նշեց, որ համայնքում լարվածությունը որոշ չափով մեղմվել է, իսկ հանդիպումից տպավորությունները դրական են, կառավարությունից սպասում են դրական պատասխանի:
«Երեկ վարչապետի օգնական Նաիրի Սարգսյանին ներկայացրեցինք մեր խնդիրն այնպես, ինչպես որ կա իրականում, քանի որ մեր մարզպետը ամեն ինչ չէ, որ ճիշտ կամ պատշաճ ձևով է ներկայացնում: Մենք հետդարձի ճանապարհ չունենք, պայքարելու ենք մինչև վերջ, քանի որ դա մեր համայնքն է, մենք ենք այնտեղ ապրում և որևէ մեկը չի կարող իր կամքը մեզ թելադրել: Մեր մարզպետը հայտարարում է, թե ուզում է մեր համայնքի համար ամեն ինչ անել, բայց մի քանի ավագանի խանգարում են: Բայց, իրականությունն այդպիսին չէ»,- ասաց Ա. Խուրշուդյանը:
Հիշեցնենք, որ Եղեգնուտի նախկին գյուղապետ Ռազմիկ Մարգարյանը, 2018թ․ իշխանափոխությունից հետո գյուղացիների ճնշման ներքո վաղաժամկետ վայր էր դրել իր լիազորությունները, այնուհետև, այդ ժամանակվա մարզպետ Գագիկ Միրիջանյանի որոշմամբ գյուղապետի պաշտոնակատար էր նշանակվել Ռազմիկ Մկրտչյանը: Հետագայում նախկին գյուղապետը դիմել էր վարչական, ապա վերաքննիչ դատարան՝ պահանջելով անվավեր ճանաչել մարզպետի որոշումը։ Մոտ 1,5 տարի տևած դատաքննությունից հետո դատարանն անվավեր է ճանաչել Արմավիրի նախկին մարզպետ Գագիկ Միրիջանյանի՝ Ռազմիկ Մկրտչյանին «Եղեգնուտ համայնքի ղեկավարի պաշտոնակատար նշանակելու մասին» որոշումը և նախկին գյուղապետին վերականգնել է իր պաշտոնում:
Այս ամենը դժգոհության մեծ ալիք էր բարձրացրել Եղեգնուտ համայնքում: Ավագանին որպես խնդրի լուծում առաջարկել էր տեղական հանրաքվե անցկացնել, սակայն օգոստոսի 11-ին ավագանու դիմումը մերժվել է ընտրատարածքային հանձնաժողովի, իսկ հետո նաև ԿԸՀ-ի կողմից։ Ստեղծված իրավիճակի պատճառով համայքում ղեկավարի պաշտոնակատար չկա, պահպանվել է միայն ղեկավարի տեղակալի լիազորությունները, որի լիազորությունները սահմանափակ են: Ստացվել է մի իրավիճակ, որ, փաստորեն ո՛չ գույքահարկ է հնարավոր լինում հավաքագրել, ո՛չ այլ փոխանցումներ իրականացնել:
«ԿԸՀ-ն մեր դիմումը մերժել է այն հիմքով, որ տեղական հանրաքվեն պետք է կազմակերպի համայնքի ղեկավարը: Բայց եթե մենք ղեկավար չունենք, ո՞վ պետք է այն կազմակերպի: Եթե մենք մեր հարցն ենք ուզում լուծել, ապա կարելի էր այլ մոտեցում ցուցաբերել, օրենքում փոփոխություն կատարել և այլն: Եթե ցանկություն ունենան՝ կանեն: Ավագանու վերջին ընտրությունից հետո, անցած ինը ամիսների ընթացքում համայնքն այնքան առաջ գնաց, որ 34 տարի ղեկավարած նախկին գյուղապետի ժամանակ այդքան գործ չէր արվել»,- ասաց ավագանու անդամը:
Նշենք նաև, որ Եղեգնուտի նախկին գյուղապետ Ռազմիկ Մարգարյանը նախկին ՀՀԿ-ական է, 34 տարի ղեկավարել է համայնքը: Այսօր համայնքում գրեթե կողմնակիցներ չունի, ամենաշատը 15-20 % , այն էլ բարեկամ-հարազատների շրջանում, ասաց Ա. Խուրշուդյանը:
«Նրա կողմնակիցները շահադիտական նկատառումներից ելնելով են ուզում, որ նա վերադառնա, իսկ մենք 600-ից ավելի ստորագություն ենք հավաքել, որոնք չեն ցանկանում, որ նա հետ վերադառնա: Մարզպետն էլ է իրեն սատարում ամեն կերպ և արգելափակում է մեր ցանկացած գործողություն: Համայնքը ներառված է կառավարության կողմից իրականացվող 170 մլն արժողությամբ սուբվենցիոն ծրագրում, բայց չենք կարողանում մրցույթ հայտարարել, քանի որ գյուղապետ չունենք: Մեր պապերն են հիմնել ու շենացրել մեր գյուղը, մենք էլ պետք է նրանց գործը շարունակենք: Թույլ չենք տալու, որ ով ինչ ուզի անի: Մարզպետն այսօր կա, վաղը կարող է ուրիշը լինել, իսկ մենք ապրել ենք ու շարունակելու ենք ապրել այստեղ»,- ասաց ավագանու անդամը:
Արմինե Գրիգորյան
