Մարալիկի ծննդատան խնդիրը պետք է լուծի մարզպետարանը
ՀԱՍԱՐԱԿՈՒԹՅՈՒՆ
Մարալիկի ծննդատան աշխատակիցները առավոտից բողոքում էին, որ կառավարության կողմից ֆինանսավորումը դադարեցնելու պատճառով, կանգնել են ֆինանսական լուրջ խնդիրների առջև:
Ծննդատան տնօրենի ժամանակավոր պաշտոնակատար Անուշ Հովսեփյանը 1or.am-ի հետ զրույցում նշեց, որ բաժանմունքի պետպատվերը թեև մերժվել է, սակայն այդ մասին մինչ օրս կառավարության որոշում չկա: Ուստի, որևէ իրավական հիմք չկա հաստատության 13 աշխատակցի աշխատանքից ազատելու համար:
«Չկա հստակ իրավական ակտ, որի հիման վրա հնարավոր լինի ծանուցել աշխատակիցներին ազատման մասին։ Եվ, փաստորեն, ստացվում է, որ աշխատակիցները գտնվում են աշխատանքի մեջ, սակայն, աշխատավարձ չեն ստանում: Արդեն 7 ամսվա աշխատավարձ չենք վճարել, որը կազմում է 12 մլն դրամ»,- ասաց Ա. Հովսեփյանը։
Այս պայմաններում հունվարին 6 ծնունդ են ընդունել: Դրանից հետո մինչ այս պահը կենտրոնում ևս 21 կին է ծննդաբերել, բայց աշխատակիցները աշխատավարձ այդպես էլ չեն ստացել։ Ստեղծված իրավիճակում ծննդատան տնօրենի ժամանակավոր պաշտոնակատարը իրավունք չունի աշխատանքից որևէ մեկին առանց իրավական հիմքի ազատել։
Խնդրի լուծման համար մեկ շաբաթ առաջ նամակ են ուղարկել վարչապետին, բայց ոչ մի արձագանք դեռ չեն ստացել։ Եթե այսպես շարունակվի, չի բացառվում, որ հաստատությունը լուծարվի։
Խնդրի մասին պարզաբանում ստանալու համար դիմեցինք Առողջապահության նախարարի մամուլի խոսնակ Ալինա Նիկողոսյանին: Նա 1or.am-ին տեղեկացրեց, որ պայմանների անբավարար լինելու պատճառով նախարարությունը Մարալիկի ծննդատանը պետական պատվեր չի հատկացրել: Բացի այդ, հնարավորություն է տրվել որպեսզի բարեփոխումներ իրականացնեն:
«Հանձնաժողովն է գնահատում, թե կատարված բարեփոխումները բավարարում են արդյո՞ք սահմանված չափանիշներին: Նույն խնդիրները եղել են Ախուրյանում և Գյումրիում, բայց շտկումներից հետո վերջին մեկ տարվա ընթացքում ծնունդներ ընդունելու գործընթացը շարունակվում է այնտեղ խնդիրներ չկան: Ինչ վերաբերում է աշխատավարձ չստանալուն, ապա այդ հարցով զբաղվում է մարզպետարանը, ուստի այդ խնդրով ծննդատան տնօրինությունը պետք է դիմի մարզպետարանին, քանի որ, եթե չկա պետական պատվեր ապա նախարարությունը որևէ պարտավորություն չունի որևէ բժշկական հաստատության հանդեպ»,- ասաց Ա. Նիկողոսյանը:
Արմինե Գրիգորյան
