Պուտինն ու Մերկելը քննարկել են Բելառուսում տիրող իրավիճակը
ՊԱՏՄՈՒԹՅԱՆ ԱՅՍ ՕՐԸ
Գերմանիայի կանցլեր Անգելա Մերկելն այսօր հեռախոսով բանակցություններ է վարել ՌԴ-ի նախագահ Վլադիմիր Պուտինի հետ: Քննարկվել է օգոստոսի 9-ի նախագահական ընտրություններից հետո Բելառուսում տիրող իրավիճակը: Կանցլերը շեշտել է, որ ճգնաժամը հաղթահարելու նպատակով բելառուսական կառավարությունը պետք է ձեռնպահ մնա խաղաղ ցուցարարների դեմ բռնության գործադրումից, անմիջապես ազատ արձակի քաղբանտարկյալներին և ընդդիմության ու հասարակության հետ համազգային երկխոսության մեջ մտնի:
Հեռախոսազրույցը կայացել է գերմանական կողմի նախաձեռնությամբ:
Մերկելը հաղորդել է, որ դիվանագիտական ուղիներով կապվում է Բելառուսի նախագահ Ալեքսանդր Լուկաշենկոյի հետ՝ երկրում տիրող իրավիճակը կարգավորելու նպատակով:
Ռուսական կողմը նշել է, որ Բելառուսում կայացած նախագահական ընտրություններից հետո երկրի իրավիճակը հանգամանորեն վերանայվել է: Պուտինն անընդունելի է համարել Բելառուսի ներքին գործերին խառնվելու ցանկացած արտաքին փորձեր, որոնք կարող են հանգեցնել ճգնաժամի հետագա սրացմանը: Նա իրավիճակի շուտափույթ կարգավորման հույս է հայտնել:
Պուտինն ու Լուկաշենկոն արդեն երկու անգամ հեռախոսազրույց են ունեցել Բելառուսում տիրող իրավիճակի վերաբերյալ: Կողմերը պայմանավորվել են, որ երկրում ներքին սպառնալիքների ազդեցությամբ իրավիճակի սրման դեպքում համատեղ կգործեն:
Նյութը հրապարակման պատրաստեց Լիլիթ Ամիրաղյանը:
