«Վեկտոր»-ը սկսել է կորոնավիրուսի դեմ պատվաստանյութի փորձարկումների երկրորդ փուլը
ՀԱՍԱՐԱԿՈՒԹՅՈՒՆ
Նովոսիբիրսկի վիրուսոլոգիայի և բիոտեխնոլոգիաների պետական գիտական «Վեկտոր» կենտրոնը սկսել է կորոնավիրուսի դեմ պատվաստանյութի փորձարկումների երկրորդ փուլը:
Սպառողների իրավունքների պաշտպանության և մարդու բարեկեցության վերահսկման դաշնային ծառայության ղեկավար Աննա Պոպովան հայտնել է, որ այսօր անցկացվում են կլինիկական հետազոտություններ, և բոլոր հատուկ կերպով ընտրված կամավորների ինքնազգացողությունը լավ է: Պատվաստանյութ ներարկվածները ոչ մի կողմնակի ռեակցիա չունեն. նույնիսկ, սրսկման հատվածում կարմրություն չի դիտվում:
Պոպովան Գամալեյի անվան կենտրոնի և «Վեկտորի» ստեղծած պատվաստանյութերի տարբերության վերաբերյալ հարցին պատասխանել է, որ ինչպես ՌԴ-ում, այնպես էլ ցանկացած այլ երկրներում պետք է լինեն կորոնավիրուսի դեմ մի քանի տարբեր պատվաստանյութեր:
Փորձարկումների երկրորդ փուլին մասնակցում է 86 կամավոր:
Հիշեցնենք, որ հուլիսի 24-ին «Վեկտոր» կենտրոնը Առողջապահության նախարարությունից իրավունք է ստացել կամավորներին պատվաստանյութի փորձարկումների ենթարկելու համար: «Վեկտոր»-ի ղեկավար Ռինատ Մակսյուտովը հայտնել է, որ պլանավորվել է պատվաստանյութն արտադրել նոյեմբերին:
ՌԴ-ի նախագահ Վլադիմիր Պուտինը օգոստոսի 11-ին հայտարարել է կորոնավիրուսի դեմ պատվաստանյութի՝ աշխարհում առաջին պատվաստանյութի գրանցման մասին: Պատվաստանյութը կարող է քաղաքացիական շրջանառության մեջ մտնել 2021 թվականի հունվարի 1-ից: Պատվաստումը կամավորական բնույթ է կրելու:
