Orer.am-ը ներկայացնում է անցած օրվա՝ օգոստսի 3-ի ամփոփ լրահոսը

Օգոստոսի 2-ի լույս 3-ի գիշերը և երեկ առավոտյան հայ-ադրբեջանական պետական սահմանին պահպանվել է հարաբերական անդորր։ Ադրբեջանական կողմը, սակայն, հրաձգային զինատեսակներից խախտել է կրակի դադարեցման ռեժիմը 8 անգամ` հայկական դիրքերի ուղղությամբ արձակելով շուրջ 95 կրակոց:

ՀՀ շրջակա միջավայրի նորանշանակ նախարար Ռոմանոս Պետրոսյանի կարգադրությամբ ամենասեղմ ժամկետում կկասեցվի Սևանի «Սպիտակ Շորժա» հանգստի գոտու գործունեությունը և կապամոնտաժվեն ապօրինի տաղավարները։

Համավարակի տարածման պայմաններում բեռնատարների որոշ վարորդներն օգտվելով ստեղծված իրավիճակից, մաքսային հսկողությունը շրջանցելով, փորձում են հանրապետություն ներկրել թաքցված ապրանքներ: ՊԵԿ-ը տեղեկացնում է, որ Բագրատաշենի մաքսայինի աշխատակիցներն օրերս հսկողություն իրականացնելու նպատակով զննության են ենթարկել ՀՀ քաղաքացիների կողմից շահագործվող 2 տրանսպորտային միջոց:

ԱՄՆ-ից, Բելառուսից, Արաբական Միացյալ Էմիրություններից, Վրաստանից, Լիբանանից և Ռուսաստանի Դաշնության տարբեր քաղաքներից առաջիկայում չարթերային թռիչքներ կիրականացվեն դեպի Երևան և Գյումրի ու հակառակ ուղղությամբ: Նշված չվերթներով հայրենիք վերադառնալու հնարավորություն կունենան ՀՀ քաղաքացիներն ու անձինք, որոնք ունեն Հայաստան ժամանելու իրավունք:

Ճապոնիայում առաջին անգամ կորոնավիրուս է հայտնաբերվել ընտանի կենդանիների մոտ: Վիրուսը հայտնաբերվել է երկու շան մոտ, որոնք պատկանում են տարբեր տերերի, որոնց մոտ ավելի վաղ ևս կորոնավիրուս է հաստատված եղել: Covid-19-ով վարակված շների առողջական վիճակի վատթարացում, սակայն, չի արձանագրվել: Կենդանիները պահվում են առանձին և այդպես կշարունակվի մինչև թեստի բացասական արդյունքի արձանագրումը: Շների հետ նույն վայրում գտնված մյուս կենդանիների ՊՇՌ թեստի արդյունքները, սակայն, եղել են բացասական:

Պարետ Տիգրան Ավինյանի որոշմամբ երեկվանից թույլատրվել է լողավազանների գործունեությունը։ Սահմանվել են նոր կանոններ՝ մարզասրահներում անվտանգության պահպանման համար։