Մեր զինվորները, թշնամուն լռեցնելուց բացի, հասցնում են մրցույթների մասնակցել ու նաև հաղթել
ՀԱՍԱՐԱԿՈՒԹՅՈՒՆ
Պարզվում է՝ մեր զինվորները ոչ միայն լավ կռվում են, այլև հասցնում են նաև մասնակցել գեղարվեստական ինքնագործունեության խմբային մրցույթներին:
Հայոց բանակում ծառայող շարքային Հայկ Մանուկյանը, ով այս օրերին զենքը ձեռքին մեր սահմանն է անառիկ պահում, հասցնում է նաև ազատ ժամանակ ոչ միայն երգեր ու բանաստեղծություններ գրել, այլև մասնակցել մրցույթների ու հաղթող ճանաչվել: Վերջերս կազմակերպված մրցույթին նա հանդես եկավ միանգամից երկու երաժշտական կատարմամբ և ասմունքով: Նրաակտիվությունը չվրիպեց նաև լրագրողի աչքից, ով առանձին հոդվածով ներկայացրեց Հայկին:
Մշակի ընտանիքում ծնված ու մեծացած հայրենիքի զինվորը հայրենիքին ծառայելը ոչ թե իր պարտքը, այլ պարտականությունն է համարում: Նա շատ երազանքներ ունի, սակայն այսօր ծառայության ընթացքում իր թիկունքում ամեն օր իր ընտանիքի, հարազատների ու ընկերների «շնչառությունը» զգալով` զենքը ձեռքին կարողանում է անառիկ պահել հայոց սահմանը: Զենքից բացի՝ իր խրոխտ ձայնով նա կարողանում է իր երգերով ոգևորել զինակից ընկերներին և հպարտանում է մեր բոլոր զինվորների հաջողություններով, ովքեր կարողանում են ոչ միայն լռեցնել անսանձ հակառակորդին, այլև զսպել նրա ցանկացած ոտնձգություն:
Շարքային Մանուկյանը, սակայն, համաձայն չէ այն տեսակետին, որ հայրենիքի առջև պարտքը երկու տարի բանակում ծառայելն է միայն: Նրա կարծիքով՝ հայրենիքի հանդեպ ծառայությունը նախ սկսվում է զինվորական հագուստով, ապա շարունակվում ողջ քաղաքացիական կյանքի ընթացքում:
«Մշակն իր պարտքն ունի, շինարարը, քաղաքագետը, տնտեսագետն ու մյուս մասնագիտություններ ունեցողներն էլ իրենց պարտավորության չափն ունեն: Ու եթե բոլորն էլ իրենց պարտքի չափը զգան ու իրենց ուժերի ներածին չափով գործեն ի շահ Հայաստանի, ապա բոլորս միասին կունենանք ավելի բարեկեցիկ երկիր»,- ասում է Հայկ Մանուկյանը:
Հայ-ռուսական սլավոնական համալսարանի ուսանողը ինստիտուտի ռեկտոր Ա.Դարբինյանից նույնպես շնորհակալագիր է ստացել՝ հայ զինվորի առաքելությունն արժանապատիվ կատարելու համար:
Հայկը հասցնում է ոչ միայն փայլուն ծառայել, այլև փայլել նաև մրցույթների ժամանակ: Ծառայության ընթացքում ԼՂՀ ՊԲ զինվորը պարգևատրվել է ՊԲ մի շարք պատվոգրերով, իսկ ԼՂՀ-ում կազմակերպված շարադրությունների մրցույթին նրա «Հայրենիքի սահմանների պաշտպանությունը բոլորիս սրբազան պարտքն է» վերնագրով շարադրությունը ճանաչվել է լավագույնը և գրավել երրորդ տեղը, ՊԲ հրամանատարի կողմից պարգևատրվել է նաև օբսիդիանից պատրաստված հուշանվերով:
Orer.am-ի հետ զրուցում Հայկի մայրը՝ Նվարդ Սարգսյանը, ասաց, որ երկու որդի ունի, մեկն արդեն ավարտել է ծառայությունը, իսկ Հայկը մի քանի ամսից կզորացրվի: Որդիների հաջողությունները ոգևորում են ոչ միայն իրեն, այլ ամուսնուն և իրենց բոլոր հարազատներին, քանի որ այս դժվարին պայմաններում իրենց հաջողվել է ամենանվիրական պատգամը որդիներին փոխանցել և հայրենիքին պիտանի քաղաքացի ու լավ մարդ դաստիարակել:
Ասվածին հավելենք, որ Հայկով ու նրա զինակից ընկերներով հպարտանում են ոչ միայն նրանց հարազատները, այլև ողջ հասարակությունը, քանի որ նրանց գիտելիքի ու բազկի շնորհիվ է, որ նենգ թշնամին կրկին մտել է իր բույնը:
Ջայնդ անսպառ, միտքդ պայծառ, հա՛յ զինվոր: Անփորձանք ծառայություն և բարի վերադարձ դեպի քաղաքացիական կյանքի երկարատև ծառայություն:
Արմինե Գրիգորյան
