Առաջադրումների ժամկետն ավարտվում է. ՔՊ-ն ու ՀՅԴ-ն 1-ական թեկնածու ունեն, ՀՀԿ-ն՝ 20
ՔԱՂԱՔԱԿԱՆՈՒԹՅՈՒՆ
Վաղը ժամը 18:00-ին կավարտվի ապրիլի 17-ին կայանալիք ՏԻՄ ընտրություններում թեկնածուների առաջադրման ժամկետը:
Այսօր ԸԸՀ-ներում բավականին մեծ թվով առաջադրումներ են գրանցվել:
Հրազդանում երեկ առաջադրվել է նաեւ 4-րդ թեկնածուն. նոր առաջադրվածը ՀՀԿ անդամ, Հրազդանի քաղաքապետարանի ֆինանսական բաժնի առաջատար մասնագետ Ռաֆայել Գրիգորյանն է: Ինչպես տեղեկացրել էինք՝ այստեղ արդեն առաջադրվել էին գործող ՀՀԿ-ական քաղաքապետ Արամ Դանիելյանը, Քաղաքացիական պայմանագիր կուսակցության անդամ Սասուն Միքայելյանը եւ անկուսակցական Վաղարշակ Պողոսյանը:
Այսօր նոր առաջադրում է գրանցվել նաեւ Թալին քաղաքում: Գործող ՀՀԿ-ական քաղաքապետ Սարգիս Արամյանի դեմ իր թեկնածությունն է առաջադրել Թալինի կոմունալ ծառայության տնօրեն, անկուսակցական Գեւորգ Գրիգորյանը:
Լոռու մարզի Սպիտակ քաղաքի ղեկավարի միակ թեկնածուն շարունակում է մնալ փոխմարզպետ Վանիկ Ասատրյանը: Նոր առաջադրում չկա:
Առաջադրումների առումով հետաքրքրություն է նկատվում նաեւ Կոտայքի մարզի Քանաքեռավան համայնքում: Այստեղ թեկնածու է առաջադրել Հայ հեղափոխական դաշնակցություն կուսակցությունը: Առաջադրվածը անհատ ձեռներեց Հայկ Սարգսյանն է: Այստեղ սեփական թեկնածուով է հանդես գալու նաեւ ՀՀԿ-ն: ՀՀԿ թեկնածուն գործող համայնքապետ Ջիվան Քամալյանն է: Նրանց հետ մրցակցելու է անկուսակցական Գարեգին Վասիլյանը:
Կոտայքի մարզի Բյուրեղավան համայնքում թեկնածուները այսօրվա դրությամբ երկուսն են՝ գործող համայնքապետ Հակոբ Բալասյանը (անկուսակցական) եւ Բյուրեղավանի Բարեկարգում եւ կանաչապատում ՀՈԱԿ-ի տնօրեն Հայկ Եղյանը:
Մյուս, համեմատաբար փոքր համայքներում եւս առաջադրումներ շարունակվել են, սակայն ի հեճուկս նախօրոք արված հայտարարությունների՝ բացի ՀՀԿ-ից այլ կուսակցություններ դեռեւս մեծ ակտիվություն չեն ցուցաբերում:
Արագածոտնի մարզի Վերին Սասնաշենում թեկնածուները այս պահի դրությամբ երկուսն են՝ այդ թվում գործող ՀՀԿ-ական համայքանպետը: Արարատի մարզի Արեւշատ համայնքում իրավիճակը նույնն է:
Դվինում թեկնածուները 3-ն են՝ երկու անկուսակցականն ընդդեմ մեկ ՀՀԿ-ականի... եւ այսպես շարունակ:
Մարտի 18-ից 23-ը տեղւի կունենա թեկնածուների գրանցումը: Մարտի 30-ից կմեկնարկի քարոզարշավը:
