Քանաքեռում շիզոֆրենիկ տաքսիստը սպանել է կնոջը՝ «սիրեկանների» տեսիլքների պատճառով
ՊԱՏՄՈՒԹՅԱՆ ԱՅՍ ՕՐԸ
1in.am-ը գրում է.
Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Մարինե Մելքոնյանի նախագահությամբ ավարտվեց 2015 թվականի հուլիսի 4-ին Քանաքեռում Հայկանուշ Ս.-ի սպանության գործով քննությունը:
ՀՀ քրեական օրենսգրքի 104 հոդվածի 1-ին մասով և 119 հոդվածով՝ դիտավորյալ սպանության, ինչպես նաև սպանությունից առաջ պարբերաբար կնոջ նկատմամբ բռնություն գործադրելու, կնոջը խոշտանգելու մեղադրանքներ էին առաջադրվել Հայկանուշ Ս.-ի ամուսնուն՝ Վահան Կ.-ին:
Նախաքննական մարմինը Վահան Կ.-ի նկատմամբ նշանակել էր դատահոգեբուժական ստացիոնար փորձաքննություն, որի եզրակացությամբ Վահան Կ.-ի մոտ հայտնաբերվել է շիզոֆրենիա, պարանոիդ ձև:
Համաձայն դատահոգեբուժական փորձաքննության՝ հանցավոր արարքները Վահան Կ.-ն կատարել է ցնորազառանցական ապրումների ազդեցության տակ: Այդ ապրումները նրան զրկել են իր գործողությունների համար հաշիվ տալու ունակությունից:
Ըստ եզրակացության՝ Վահան Կ.-ն բարձր սոցիալական վտանգավորություն է ներկայացնում: Խորհուրդ է տրվել նրան հարկադիր բուժել հոգեբուժական կլինիկայի հատուկ հսկողության բաժանմունքում:
Վահան Կ.-ն ճանաչվել է անմեղսունակ:
Ընդհանուր իրավասության դատարանը քննեց անմեղսունակության վիճակում քրեական օրենքով արգելված արարք կատարած Վահան Կ.-ի նկատմամբ բժշկական բնույթի հարկադրանքի միջոց կիրառելու հարցը:
Ըստ գործի տվյալների՝ սպանությունը կատարվել է 2015 թվականի հուլիսի 4-ի գիշերը՝ ժամը 2-ն անց 45-ի սահմաններում:
41-ամյա Վահան Կ.-ն և Հայկանուշ Ս-ն ամուսիններ էին, ապրում էին Քանաքեռում: Համատեղ ամուսնական կյանքում 2 դուստր ունեն, մեկը չափահաս, մյուսը՝ անչափահաս:
Վահան Կ.-ն մինչև կնոջ սպանությունը երբևէ որևէ հոգեբուժարանում բժշկական հետազոտում չի անցել, նույնիսկ հարազատները չեն իմացել, որ նա հոգեկան հիվանդություն ունի, այն էլ՝ «Շիզոֆրենիա, պարանոիդ ձև» ախտորոշմամբ:
Վահան Կ.-ն մշտապես անհիմն խանդել է կնոջը, խանդի հողի վրա կնոջ նկատմամբ բռնություն է գործադրել: Ըստ երևույթին հիվանդության սրացման հետ կապված՝ նա առավել ագրեսիվ է դարձել կնոջ սպանությունից մոտ մեկ ամիս առաջ, իսկ սպանությունից երկու շաբաթ առաջ նա համարյա ամեն օր ծեծի է ենթարկել կնոջը:
Տուժող կինն աշխատել է կարի ֆաբրիկայում, գործընկերների ու մտերիմների կողմից նա բնութագրվում է որպես աշխատող, խելոք, պարկեշտ կին, ով պարբերաբար ենթարկվելով ամուսնու խոշտանգումներին, լռել է, երբևէ ոստիկանություն չի դիմել: Ճիշտ է, ասում են՝ ամուսինները մի անգամ դիմում են ներկայացրել զագս՝ ամուսնալուծվելու խնդրով, բայց հետո դիմումը… հետ են վերցրել:
Հայկանուշը լուռ հանդուրժել է ընտանեկան բռնությունները ամուսնու կողմից ու, ի վերջո, իր համբերատարության ու հանդուրժողականության պատճառով դեպքի օրը դանակի մի շեշտակի հարվածով սպանվել է իր տան հյուրասենյակում:
Ըստ գործի տվյալների՝ Վահան Կ.-ի աչքին ամենուրեք երևացել են կնոջ «սիրեկանները»: Նրա աչքին իրենց տանից փախչող տղամարդիկ են երևացել, ու նա այդ տեսիլքներից առաջացած իր ամբողջ զայրույթը պարպել է կնոջ վրա՝ նրան անընդհատ մեղադրելով իրեն դավաճանելու համար:
Կնոջ նկատմամբ Վահան Կ.-ի գործադրած բռնություններին ականատես են եղել նաև ընտանիքի անդամները, ովքեր, սակայն, նույնպես լռել են, մինչև բանը հասել է սպանության:
Մինչև սպանությունը Հայկանուշ Ս.-ն բազմիցս ծեծվել է, նրա դիակի դատաբժշկական փորձաքննությամբ արձանագրվել են բազմաթիվ արյունազեղումներ գլխի, դեմքի, մարմնի այլ մասերի շրջաններում, որոնք դեպքի օրվանից ավելի վաղ էին պատճառվել: Այսինքն, եթե կինը կամ ընտանիքի անդամները բողոքեին Վահանի գործողությունների դեմ, միգուցե վերջինիս հոգեկան հիվանդությունն ավելի վաղ ախտորոշվեր, ու կինը չսպանվեր…
Վահան Կ.-ն մինչև դեպքի օրը աշխատել է: Նա իր անձնական օգտագործման «Օպել» ավտոմեքենան որպես տաքսի է վարել… Լինելով շիզոֆրենիայի պարանոիդ ձևով ագրեսիվ հիվանդ, «սոցիալական բարձր վտանգավորություն ունեցող անձ»՝ նա սպասարկել է մարդկանց, տաքսի է վարել… Ահա ինչ վտանգ է պարունակում տաքսու վարորդներին բժշկական զննության չենթարկելը, նրանց հոգեկան առողջությունն ու թմրանյութերից, հոգեմետ դեղերից կախում ունենալը չստուգելը…
Դեպքի օրը՝ գիշերով, Վահան Կ.-ն կնոջ հետ վիճաբանության մեջ է մտել հյուրասենյակում՝ կնոջը նորից մեղադրելով դավաճանության համար: Վահանը նախապես փակել է աղջիկների ննջարանի դուռը, և աղմուկի վրա արթնացած աղջիկները չեն կարողացել դուրս գալ իրենց ննջարանից: Աղջիկներից մեկը, այնուամենայնիվ, պատուհանից կարողացել է դուրս գալ, ցանկացել է մտնել հյուրասենյակ, բայց Վահանը չի թողել, ասելով, թե մորը «մորթել է»:
Վահան Կ.-ն խոհանոցային դանակով շեշտակի հարված էր հասցրել կնոջ կրծքավանդակի ձախ կեսին, վնասել էր սիրտը: Կինը վնասվածքն ստանալուց կարճ ժամանակ՝ րոպեներ անց մահացել է:
Վահան Կ.-ն նույնիսկ իրենց տուն գնացած իրավապահների մեջ կնոջ «սիրեկաններին» է տեսել… Նա ցույց է տվել շագանակագույն բռնակով խոհանոցային դանակը, որով սպանվել էր կինը, սակայն չի ընդունել, որ ինքն է սպանել, նա ասել է, թե ինքը կնոջն «օգնել է մահանալու հարցում»:
Վահանն ասել է, թե կինը ցանկացել է ինքնասպանություն գործել, դանակը կինն է դրել կրծքին, իսկ ինքը միայն այդ դանակը սեղմել է՝ «օգնելով նրան»:
Կնոջ դիակի դատաբժշկական փորձաքննության եզրակացության մեջ, սակայն, նշված է, որ նման ուժգնության հարված չէր կարող հասցվել՝ դանակը տուժողի կրծքին «սեղմելով», եղել է ուժեղ ու նպատակային հարված…
Վահան Կ.-ն նախաքննության ընթացքում հրաժարվել է ցուցմունքներ տալուց, նա ասել է, թե ցուցմունք կտա դատարանում՝ իր աղջիկների ցուցմունքից հետո: Աղջիկները դատարանում տվել են հորը մեղադրող ցուցմունքներ, ասել են այն, ինչ իրականում կատարվել է: Նրանց լսելուց հետո Վահան Կ.-ն զայրացել ու հրաժարվել է ցուցմունքներ տալուց նաև դատարանում…
Դատարան էր ներկայացել «Նուբարաշեն» հոգեբուժական կլինիկայի հատուկ հսկողության բաժանմունքի հսկիչ Սլավիկ Գասպարյանը:
Վահան Կ.-ի շահերի պաշտպան, հանրային պաշտպանի գրասենյակի փաստաբան Դավիթ Մնացականյանի միջնորդությամբ դատարանում հարցեր տրվեցին հսկիչին՝ Վահան Կ.-ի ներկա վիճակի մասին:
Հսկիչն ասաց, որ Վահան Կ.-ն օրը երկու անգամ հոգեմետ դեղեր է ընդունում: Բաժանմունքում պարզել են, որ որոշ ժամանակ Վահանը դեղերը պահել է լեզվի տակ, հետո թքել է՝ չի ընդունել անհրաժեշտ դեղերը, ինչի պատճառով նրա վիճակի սրացում է նկատվել: Ներկայումս դեղերը նրան տրվում են փոշի վիճակում, կողքին էլ նստում են՝ մինչև դեղը խմի: Իրենց բաժանմունքի հիվանդի մոտ սրացումը, ըստ հսկիչի, զգացվում է անմիջապես՝ աչքերից, շարժումներից, նույնիսկ քայլվածքից… Եթե սրացումը բավական արտահայտված է լինում, հիվանդը դեղերն ընդունում է ներարկումների ձևով:
Ըստ հսկիչ Գասպարյանի՝ ներկայումս Վահան Կ.-ն գտնվում է շատ ուժեղ հսկողության տակ: Որևէ բարելավում նրա վիճակում չի նկատվում: Հակառակը, ամռանը սրացում է եղել:
Հսկիչն ասաց, որ նման հիվանդները սովորաբար իրենց նկատմամբ բժշկական բնույթի հարկադրանքի միջոց կիրառելու՝ դատարանի որոշման մասին իմանալով՝ ավելի ագրեսիվ են դառնում: Վահան Կ.-ն իրեն հիվանդ չի համարում: Նա սպասում է, որ դատարանը կորոշի իրեն հոգեբուժարանից դուրս բերելու մասին: Վահան Կ.-ն, ըստ հսկիչի, հոգեբուժարանի տաքսոֆոնից երբեմն զանգահարում է տուն՝ աղջիկների հետ խոսելու ցանկությամբ, բայց նրանք, լսելով հոր ձայնը, հեռախոսն անջատում են… Վահանը դրանից շատ է զայրանում:
Հսկիչն ասաց, թե դատարանի որոշումը Վահանին հայտնելուց հետո պիտի ավելի զգոն լինեն՝ նկատի ունենալով, որ ագրեսիան կարող է ակտիվանալ…
Ընդհանուր իրավասության դատարանը որոշեց անմեղսունակության վիճակում քրեական օրենքով արգելված արարք կատարած Վահան Կ.-ին ազատել քրեական պատասխանատվությունից, նրա նկատմամբ բժշկական բնույթի հարկադրանքի միջոց՝ հարկադիր բուժում նշանակել հոգեբուժական կլինիկայի՝ հատուկ հսկողության բաժանմունքում:
