Եկեղեցին արդեն քյաբաբնոց են սարքել
ՎԵՐԼՈՒԾՈՒԹՅՈՒՆՆԵՐ
shame.am-ում կարդում ենք․
Լուսակերտի գյուղապետ, ՀՀԿ-ական Մաթևոս Ավագյանը անպայման պիտի վերընտրվեր: Ոչ այն պատճառով, որ մրցակիցներն էին թույլ: Նաև ոչ նրա համար, որ գյուղապետի թիկունքին կանգնած էր մարզպետ Կարապետ Գուլոյանը: Գլխավոր պատճառն այն է, որ գյուղապետի հետ էր նաև Աստված: Իհարկե, Աստված հազիվ թե տեղյակ է, որ Լուսակերտը գյուղապետ էլ ունի, բայց այնտեղ գտնվող եկեղեցին ոչ միայն տեղյակ է, այլև գրկաբաց է ընդունել իր մոլորյալ զավակին:
Թե հայ հոգևորականությանն ինչո՞ւ է այդքան անհրաժեշտ, որ ՀՀԿ-ի թեկնածուն վերստին գյուղապետ կարգվի, դրա մասին խոսելն արդեն ավելորդ է: Բայց որ նրանք կգնային նման զոհաբերության, ինչպիսին եղավ Լուսակերտում, քչերն էին սպասում: Իսկ այստեղ, արի ու տես, բոլորովին էլ վատ չեն զգացել Աստծո տաճարը նախընտրական շտաբի վերածելիս: Ու չեն էլ գտել ավելի հարմար վայր իրենց քարոզչական աշխատանքի համար, քան այդ սուրբ կառույցը:
Սրբապղծության փաստն արդեն առկա էր: Սակայն պարզվեց, որ դա էլ էր քիչ գյուղապետ Ավագյանի և նրա մեկենաս, Գագիկ Ծառուկյանի փեսա ու մարզպետ Կարապետ Գուլոյանի համար: Ու ահա նրանք որոշեցին եկեղեցին վերածել խորտկարանի: Սեղաններ գցեցին, շարեցին ուտեստներն ու խմիչքները և գյուղացիներին հրավիրեցին նախընտրական կերուխումի: Մեկը մյուսի ետևից բացվում էին շշերը, խմում էին առաջիկա ընտրություններում գործող գյուղապետի հաղթանակի կենացը, արևշատություն էին մաղթում ամենազոր մարզպետին և, հավանաբար, իրենց մտքում օրհնանքի խոսքեր էին մրմնջում նաև Ամենայն Հայոց Կաթողիկոս Գարեգին Երկրորդի հասցեին, որովհետև միայն նրա գահակալության օրոք հնարավոր դարձավ եկեղեցին վերածել զվարճանքի, հարբեցողության վայրի՝ դա համատեղելով ընտրական գործընթացների հետ:
Հիմա արդեն Լուսակերտի եկեղեցին կարելի է համարել բազմաֆունկցիոնալ կառույց: Եթե գյուղապետը մի փոքր նախաձեռնող գտնվի, ներսում կտեղադրի խաղային ապարատներ, սպորտային մրցույթներ կկազմակերպի ու համերգների կկանչի ռաբիս աստղերին:
