Իշխանությունները զբաղված են սիզիփոսյան աշխատանքով, որի արդյունքում խնդիրներն ավելի են խորանում. «Փաստ»
ՎԵՐԼՈՒԾՈՒԹՅՈՒՆՆԵՐ«Փաստ» օրաթերթը գրում է
Եթե յուրաքանչյուր երկիր մուտք է գործում բարեփոխումների շրջափուլ, ապա տեղի են ունենում կտրուկ տեղաշարժեր, ձևավորվում է դրական փոփոխությունների օրակարգ, իսկ առանցքային նշանակություն ունեցող հարցերին արագ լուծումներ են տրվում, և այդպես երկիրն առաջ է շարժվում:
Ներկայիս իշխանություններին հաջողվեց ժողովրդի քվեն ստանալ բարեփոխումների և տնտեսական հեղափոխության իրականացման խոստումների միջոցով, սակայն ավելի քան մեկուկես տարի անց էլ բարեփոխումների օրակարգ ձևավորված չէ:
Դրա փոխարեն ավելի շատ հանրային օրակարգ են նետվում ոչ թե առաջընթացին միտված նախաձեռնություններ, այլ այնպիսի որոշումներ, որոնց իրականացման համար որևէ հանրային պահանջ չկա, իսկ հետո դրանք դառնում են լայն քննարկման և քննադատությունների առարկա, ու քաղաքացիների ուշադրությունը շեղվում է իրական խնդիրներից:
Այդպիսի նախաձեռնությունների շարքում են տեղավորվում հայագիտական առարկաների դասավանդումը բուհերում ոչ պարտադիր դարձնելու, «Հայ եկեղեցու պատմություն» առարկան դպրոցական ծրագրերից հանելու որոշումները, ինչպես նաև ազգային արժեհամակարգը թուլացնելուն, Արցախյան ազատամարտի ու դրա հերոսների նշանակությունը նսեմացնելուն միտված քաղաքականությունը:
Իսկ որոշ առանցքային խնդիրներ, որոնք շատ լուրջ հանրային արձագանք են ստանում, կրկին ու կրկին հետաձգվում են՝ լուծում ստանալու փոխարեն մնալով օրակարգում:
Իշխանություններն, իհարկե, տրամադրված են հանքի շահագործման առումով և մի քանի անգամ փորձեցին դեպի հանք տանող ճանապարհը փակած ակտիվիստներին համոզել, որ բացեն այն, բայց վերջիններս այդպես էլ մնացին անդրդվելի:
Իսկ իշխանությունը հարցին վերջնականապես լուծում տալու փոխարեն, որը ենթադրում էր վճռական քայլերի իրականացում՝ կա՛մ հանքը շահագործվում է, կա՛մ ոչ, նախընտրեց հետաձգել հարցի լուծումը՝ ըստ էության նպատակ ունենալով առաջնային գծում դիտարկել սեփական իշխանության պահպանման խնդիրը:
Մինչդեռ իշխանությունների այսպիսի անվճռական և տատանվողական կեցվածքը բացասական է ազդում նաև երկրի տնտեսության և ներդրումային միջավայրի վրա, օրակարգային հարցերը չեն լուծվում, որպեսզի անցում կատարվի արդեն մյուս խնդիրներին: Նույնպիսի իրավիճակ է նաև Ստամբուլ յան կոնվենցիայի հարցում:
Այդ կոնվենցիայի վավերացման որևէ անհրաժեշտություն չկար՝ մանավանդ, որ բնակչության ճնշող մեծամասնությունն այն համարում է անընդունելի, բայց իշխանությունների կողմից ներմուծվեց քննարկումների հարթակ:
Եվ այս հարցում մեծ հանրային դիմադրության հանդիպելուց հետո արդարադատության նախարար Ռուստամ Բադասյանը հայտարարեց, թե այս տարի այդ կոնվենցիան խորհրդարանում չի քննարկվի, բայց թեման դրանով չփակվեց:
Այդ հայտարարությունը չխանգարեց, որ տեղեկություններ շրջանառվեն, թե իշխանությունները մտադրություն ունեն Ստամբուլ յան կոնվենցիան քննարկման դնել 2020 թվականի հունվար-փետրվար ամիսներին:
Եվ բացառված չէ, որ պատեհ իրավիճակում Ստամբուլ յան կոնվենցիան ծածուկ ներմուծվի ԱԺ-ի օրակարգ, որն էլ իր հերթին մեծ դժգոհության տեղիք կտա:
Մանրամասները՝ «Փաստ» օրաթերթի այսօրվա համարում
